Union Aid Abroad-APHEDA hasoru Xanana ko’oalia kona-ba relasaun iha futuru
DILI, 07 agostu 2023 (TATOLI)—Ekipa hosi Union Aid Abroad-Australian People for Health, Education and Development Abroad (APHEDA), nu’udar Uniaun Traballadór Australianu, hasoru malu ho Primeiru-Ministru, Kay Rala Xanana Gusmão, hodi felisita ba kargu no dezeja susesu durante mandatu.
“Ami ko’alia kona-ba relasaun iha futuru no kona-ba oinsá mak ita bele serbisu hamutuk iha futuru, inklui saida mak Austrália bele fó ajuda no kontinua ita-nia amizade no lasu ne’ebé mak iha ona,” Reprezentante Unon Aid Abroad-APHEDA, Lori-anne Sharp, hateten hafoin hamutuk ho delegasaun hasoru Primeiru-Ministru Xanana iha Gabinete Fronteira Marrítima, Palásiu Governu, segunda ne’e.
Notísia relevante : Austrália promete apoia Timor-Leste iha turizmu no ekonomia
Lori-anne hato’o mós katak hakarak kontinua amizade no solidaridade ho Timor-Leste.
Nia dehan, Australian Union Movement ne’ebé reprezenta traballadór millaun 1,5 iha Austrália hasoru Xefe Governu hodi ko’alia kona-ba istória no independénsia Timor-Leste.
Alende ne’e, Uniaun Traballadór Austrália ho Xefe Ezekutivu ko’alia mós kona-ba biodiversidade no kresimentu ekonomia.
“Ida-ne’e mak ami diskute, imi-nia Governu no ami hasoru difikuldade iha pasadu no ita haree hamutuk ba oin oinsá mak bele serbisu hamutuk no kontinua ita-nia amizade,” nia tenik.
Iha biban hanesan, Primeiru-Ministru, Xanana Gusmão, rekoñese kontribuisaun Uniaun Traballadór, ne’ebé hamriik defende (timor-oan) nia direitu iha funu laran no ai-laran maski hasoru problema oin-oin.
“Difikuldade oin-oin tanba hatene katak sira iha ita-nia kotuk maka halo ita konsege tahan hodi nune’e ita bele mai to’o iha referendu tinan 1999. Ita hotu hatene Governu Australianu hatene mós Governu rai sira seluk nian sein solidariedade Australiana internasionál sosiedade ne’e nian defisil liu ba ita atu hetan ukun-an tanba ne’e ha’u agradese tebes ba sira,” Xanana tenik..
Xefe Governu subliña, to’o agora sira hanoin nafatin Timor no povu ida-ne’e mak sira mai para hametin nafatin mantein relasaun ne’ebé iha.
“Ne’e duni ha’u hato’o obrigada wain, ami hadomi imi,” Xanana salienta.
Jornalista : Antónia Gusmão
Editora : Julia Chatarina
