iklan

HEADLINE, MUNISÍPIU, OÉ-CUSSE (RAEOA), SAÚDE

Atensaun, kazu infetadu HIV-SIDA iha Oé-Cusse sa’e ba 54

Atensaun, kazu infetadu HIV-SIDA iha Oé-Cusse sa’e ba 54

Diretora Servisu Saúde Oé-Cusse, Lolita dos Santos. Imajen Tatoli/Abílio Elo Nini.

OÉ-CUSSE, 09 agostu 2023 (TATOLI – Diretora Servisu Saúde Rejiaun Administrativa Espesiál Oé-Cusse Ambeno (RAEOA), Lolita dos Santos, informa, hahú hosi trimestre dahuluk to’o trimestre daruak 2023, kazu infetadu ba moras HIV-SIDA iha Oé-Cusse sa’e ba 54.

“HIV-AIDS iha Oé-Cusse aumenta sa’e ba 54, tanba antes ne’e ita iha de’it 30, maibé foin trimestre daruak sa’e ba 54, ne’e signifika aumenta 24,” Lolita dos Santos ba jornalista sira iha Oé-Cusse, kuarta ne’e.

Notísia relevante: INCSIDA rejista kazu HIV-SIDA 1.704, Oé-Cusse okupa fatin dahaat

Diretora ne’e esplika, pasiente hirak-ne’e detetadu liuhosi ezaminasaun halo screening masál, no bainhira komunidade sira hala’o tratamentu iha fasilidade saúde sira, hasai raan mak foin deteta,

“Ne’e akontese tanba kauza hosi seksuál livre, atu prevene moras HIV-AIDS ne’e maka tenke uza kondom,  no HIV-SIDA ne’e ita hatene katak, sensitivu liu, ita hatene nia númeru, naran maibé ema ne’e ita lahetene, tanba ne’e segredu, entaun tratamentu ne’e bainbain sira konsellór mak komunika direita ho sira, atu atende ba sira-nia moras ne’e,” nia katak.

Hosi númeru 54 ne’e, balu muda ona hela fatin ba iha kapitál Díli no fatin seluk, balu lakoi koopera ho atendimentu atu hetan tratamentu saúde iha fasailidade saúde sira-ne’ebé besik.

“Maibé akonsellamentu promosaun ne’e ita nafatin halo sosializasaun iha nivel aldeia, suku inklui fatin públiku sira hetan eskola, maibé dalaruma depende fali hosi pasiente sira-ne’e rasik,” nia katak.

Entretantu, tuir dadus ne’ebé rejista iha servisu saúde Oé-Cusse, dezde 2013 rejista ema-ne’ebé moras infatadu HIV-AIDS hamutuk 33, no dadús mate hamutuk na’in-10, no kontinua sei moris iha na’in-23.

Notísia relevante: INCSIDA kapasita profisionál saúde Oé-Cusse mellora atendimentu HIV-SIDA

Jornalista: Abílio Elo Nini

Editor: Evaristo Soares Martins

iklan
iklan

Leave a Reply

iklan
error: Content is protected !!