DILI, 10 agostu 2023 (TATOLI)—Ministru Administrasaun Estatál, Tomás do Rosário Cabral, aprezenta projetu dekretu Governu iha reuniaun Konsellu Ministru (KM) estraordinária, kinta ne’e, no hetan ona aprovasaun, kona-ba data realizasaun asembleia aldeia no konsellu suku iha ámbitu prosedimentu ba eleisaun líder komunitáriu sira.
“Hafoin aktu eleitorál sira ne’ebé realiza ona iha fulan-outubru no novembru tinan 2016 no hili ona líder komunitáriu atuál sira, agora hahú prosesu eleisaun ba membru órgaun suku sira, ne’ebé sei asume responsabilidade durante períodu tinan 2023 to’o 2030,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Deputada PD-FRETILIN enkoraja feto partisipa iha eleisaun xefe suku
Konsellu suku kompostu hosi xefe suku, delegadu no delegada aldeia, xefe aldeia sira, lia-na’in no reprezentante juventude suku, sira ne’e hotu eleitu ba mandatu tinan hitu.
Iha loron 13 outubru 2023, konsellu suku sira sei hasoru malu hodi estabelese meza eleitorál suku no simu kandidatura xefe suku sira
Enkuantu, iha loron 28 outubru 2023, asembleia aldeia sira sei hasoru malu hodi realiza eleisaun delegada aldeia ba konsellu suku, delegadu aldeia ba konsellu suku no xefe aldeia no xefe suku.
“Karik laiha kandidatu xefe suku sira ida hetan liu metade hosi votu válidu ne’ebé hasai, asembleia aldeia sira hasoru malu hodi realiza votasaun daruak iha loron 13 novembru 2023,” esplika nota hosi ezekutivu.
Konsellu suku sira hasoru malu iha loron 08 novembru 2023 hodi hili lian-na’in no reprezentante juventude ho asentu iha konsellu suku nian.
Nune’e, iha Suku sira ne’ebé hala’o votasaun daruak hodi hili sira-nia xefe suku, konsellu suku nian sei hasoru malu iha loron 23 novembru 2023 hodi hili lian-na’in no reprezentante juventude ho asentu iha konsellu suku.
Kalendáriu ida-ne’e sei la aplika ba suku sira ne’ebé mandatu hosi sira-nia líder komunitáriu nian sei termina iha abríl 2024
Jornalista : Antónia Gusmão
Editora : Julia Chatarina
