BNCTL sei halo pagamentu ba idozu-invalides 9,587 iha Bobonaro
MALIANA, 11 agostu 2023 (TATOLI) – Banku Nasionál Komérsiu Timor-Leste (BNCTL, sigla portugés) sukursál Maliana, ajenda ona orariu katak iha loron 14 fulan ne’e sei halo pagamantu faze dahuluk 2023 ba idozu no invalides na’in-9,587 iha munisípiu Bobonaro ho totál orsamentu $3,279,924.00.
Koordenadór BNCTL sukursál Maliana, Egídio Tavares, esplika, benefisiáriu hirak-ne’e komposta hosi idozu na’in-9,064 ho totál osan $3,100,095.00 no invalides na’in-523 ho totál orsamentu $179,829.00.
Notísia relevante: INSS sei halo pagamentu ba idozu-invalidéz 99,564 iha 14 agostu
“Pagamentu ba idozu no invalides faze primeiru ne’e iha munisípiu Bobonaro totál ema 9,587, ninia pagementu sei hahú iha loron 14 fulanagostu, komesa iha postu administrativu Maliana, sei hahú iha suku Lahomea ho totál benefisiáriu 321, depois ba Ritabou, Odomau, Holsa, Tapo-Memo no seluk tán,” nia informa ba jornalista sira, iha Maliana, sesta ne’e.
Kona-bá Idozu no invalides ne’ebé dukumentu hanesan Billete Identidade (BI) no Kartaun Eleitorál laiha mos BNCTL sei kontinua halo pagamentu, hafoin kompleta fila-fali.
Jerente ne’e BNCTL mós halo akordu ona ho Institutu Nasionál Seguransa Sosiál (INSS) atu halo pagamentu direita ba benefisiáriu sira-ne’ebé labele mai direita fatin pagametu.
“Iha akordu ne’ebé ami halo ne’e, ami tenke ser simu prazu loron 15 antes ne’e, lista sira idozu no invalides sira-ne’ebé la’o labele fó mai ami ho sira-nia reprezentante, ne’e ami bele hatene reprezenta legál sira bele halo pagamentu,” nia katak.
Koordenadór ne’e haktuir, pagamentu sira antes liubá BNCTL hasoru difikuldade, liuliu estrada ladi’ak, maibé iha tinan ne’e nafatin iha komitementu atu aselera prosesu tuir oráriu ne’ebé publika ona.
Nia husu ba benefisiáriu sira-ne’ebé utiliza Kartaun Authomatic Teller Mechine bele foti direita iha mákina sira-ne’ebé instala ona iha kapitál Maliana no fatin seluk tán.
“Ba benefísiáriu sira-ne’ebé seidauk iha ATM, hein ho pasiénsia ami sei ba selu to’o iha suku,” nia fó hanoin.
Notísia Relevante:Lista idozu-invalidés foun hosi Bobonaro submete ona ba INSS
Jornalista : Sérgio da Cruz
Editór : Evaristo Soares Martins
