Governu selebra semana mundiál susubeen inan iha Baucau
BAUCAU, 11 agostu 2023 (TATOLI) – Governu liuhosi Ministériu Saúde (MS) sesta ne’e, selebra semana mundiál susubeen-inan ho tema “Kria ambiente hodi tulun ha’u, atu fó susu ha’u-nia oan iha fatin ne’ebé deit” iha suku Gariuai, postu Baucau Vila.
Ministra Saúde, Elia Amaral, esplika, durante moris dahuluk labarik nian importante tebes ba dezenvolvimentu dignititivu ba labarik tanba alende ne’e kompleita alimentár labarik, susubeen inan nian atu atua ajente imunizasaun dezenvolve psikolojia no kontribui hamenus mortalidade ba labarik.
“Tinan-ne’e Ministériu Saúde hamutuk ho Gabinete Prezidenti Repúblika no parseiru dezenvolvimentu serbisu hamutuk utiliza semana mundiál susubeen inan nian hodi hasa’e esforsu atu promove susubeen inan ne’ebé kualidade atu salva moris bebe nian,” Ministra Saúde hateten iha sede suku Gariuai, sesta ne’e.
Eventu refere realiza ho objetivu atu fó koñesementu no kompreensaun ba inan sira atu salva moris bebé no hahu sira-nia moris ne’ebé di’akliu iha inísiu moris.
Elia Amaral agradese ba komisaun organizadora, Prezidente Repúblika, parseiru dezenvolvimentu hanesan OMS, UNICEF, União Europeia, Child Fund ne’ebé kontribui hodi hadia nutrisaun ba labarik iha Timor-Leste.
MS hamutuk ho OMS no União Europeia dezenvolve matadalan kona-ba prátika fó hahaan ba bebé no ba labarik liuhosi tratamentu ba pesóal saúde sira iha munisípiu hotu.
Nia dehan, liuhosi susubeen-inan riku ho proteína atu proteje kosok oan sira, kontaktu hosi isin ba isin entre bebé ho inan atu hamanas kosok oan sira nune’e bele prevene temperatura isin tún no hasa’e oportunidade moris.
“Ita tenke halo kampaña nune’e susubeen inan nian bele sai prioridade ba labarik sira hahu hosi moris obrigatóriu to’o fulan-neen no kontinua too tinan-rua,” Elia Amaral akresenta.
Vise Primeiru Ministru no Ministru Koordendór Asuntu Dezenvolvementu Rurál, Mariano Assanami Sabino, konsidera liuhosi inan mak hahoris oan ne’ebé futuru sei lidera Timor-Leste hanesan atúal Primeiru Ministru Xanana Gusmão, Taur Matan Ruak, Mari Alkatiri no seluk tan tanba ne’e susubeen-inan inportante ba dezenvolvimentu labarik nian.
“Ita sira-ne’e hotu maihosi inan ne’ebé simples hahoris líder boot iha mundu inklui Timor-Leste,” Mariano Assanami Sabino hateten.
Atividade ne’ebé halao iha eventu refere hanesan tetu labarik no distribusaun vitamina A ba labarik, animasaun jogu saudável, akonsellamentu no promosaun saúde, konsulta espesializada hosi médiku espesialista iha obstetelica.
Alende ne’e, atividade seluk mak halo konsulta tipu pediatria, interna, kardilojia,dertamatolojia, radiolojia, olftalmolojia no fisioterapia inklui demistrasaun te’in ai-haan lokál ba inan isin-rua.
Jornalista : Natalino Belo
Editór : Evaristo Soares Martins
