Klínika Daitula Baucau rejista veteranu 513 sofre moras ipertensaun
BAUCAU, 15 agostus 2023 (TATOLI) – Klínika David Alex ‘Daitula’ rejista veteranu hamutuk na’in-513 sofre moras ipertensaun durante trimestrál daruak tinan-2023 nian.
Koordenadór klínika David Alex ‘Daitula’ Baucau, Leonel da Silva, esplika, veteranu hirak-ne’e deteta moras ipertensaun bainhira halo tratamentu nune’e parte klínika deside kontinua halo atendimentu no vizita ambulatóriu.
“Kazu veteranu sira moras ne’ebé rejista mak sofre moras ipertensaun,” Koordenadór Klínika David Alex ‘Daitula’ informa ba Agência TATOLI iha Vila Nova, tersa ne’e.
Hosi númeru refere, veteranu idade hosi 60 to’o 60 hamutuk 372 komposta hosi mane na’in-248 no feto 124, idade 70-89 hamutuk 112 kompostu mane na’in-84 no feto 28 no idade 80 ba leten hamutuk 29 kompostu mane 20 no feto nain-9.
Klínika Daitula rejista mós veteranu seluk ne’ebé sofre moras hanesan pulmaun króniku hamutuk 441, prostata 75, rins 44, tiroid 89, kankru 17, artrits 48, stroke hamutuk nain-11 inklui moras seluk ho tótal hamutuk 1.820.
“Tanba tempu ami tenke telefone tuir atu mai kontinua halo tratamentu,” Leonel da Silva akresenta.
Klínika Daitula mos rejista veteranu nain-38 mak kontinua ba faze operasaun boot iha HorEX tanba sofre rins, tiroid no kabun kompostu trimestrál dahuluk nain-31 no trimestrál daruak nain-hitu.
Enkuantu operasaun kiik ba pasiente veteranu iha tinan-2023 hamutuk na’in-222 ne’ebé sofre moras hanesan lipoma no abses ne’ebé halao iha klinika Daitula.
Jornalista : Natalino Belo
Editór : Evaristo Soares Martins
