Konstrusaun sala neen iha EBC Gumer besik finaliza
BOBONARO, 15 agostu 2023 (TATOLI)-Projetu konstrusaun sala-aula neen iha Ensinu Báziku Sentrál (EBC, sigla portugués) Gumer, suku Lourba, postu administrativu Bobonaro, munisípiu Bobonaro, tama ona ba faze finalizasaun tanba hela de’it pinta, monta janela no odamatan.
Projetu komunitária 2021 ne’e fazeadamente ninia progresu fíziku atinje ona 85% no daudaun ne’e badaen sira pinta hotu ona sala tolu, dadaun ne’e sei prepara atu pinta tán sala tolu no monta ajuleizu ba sintina.
Diretora EBC Gumer, Guilhermina de Jesus Gusmão, agradese ba VIII Governu Konstituisionál liuhosi Ministériu Edukasaun ne’ebé mak tau ona prioridade hodi konstrui eskola refere.
Notísia relevante: EBC Gumer menus livru no laiha biblioteka
“Ida-ne’e bele kompleta ona nesesidade labarik sira-nian, tanba antes ami hetan projetu ne’e labarik sira hasoru difikuldade, aula ida iha kotuk ne’ebá ninia kondisaun ladi’ak, kakuluk, didin sira estragus hotu, entaun labarik sira bainhira tempu udan, sira labele kontinua sira-nia ensinu no aprendizajen,” nia informa ba Tatoli, iha Bobonaro, tersa ne’e.
Tuir loloos obra refere halo ona inaugurasaun, maibé to’o agora sei iha faze konstrusaun, tanba kondisaun klima udan no estrada ladi’ak difikulta mobilizasaun materiál lokál no fabrikadu mai lokasaun projetu.
Enkuantu, Ministériu Edukasaun, Juventude no Desportu (MEJD) prevee $2,409.512,03 hodi konstrui no reabilita eskola hamutuk 21 ho sala aula 76 iha munisípiu Bobonaro, ne’ebé tama iha projetu komunitária.
Entretantu, eskola 21 iha Bobonaro ne’ebé tama projetu komunitária kompostu hosi ensinu pre-eskolár tolu, ensinu báziku 17 no ensinu sekundáriu jerál ida mak hanesan EPE Atu-Aben, EPE Rita-bou, EPE Holsa, EBC Gumer, EBC Hauba, EBF Dilai.
Nune’e mós EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou, EBF Rairobo, ESJ Númeru I Maliana no EBF 12 Abríl Março.
Notísia Relevante:Primeiru-Ministru sei inaugura infraestrutura edukativa hamutuk 59
Jornalista: Sérgio da Cruz
Editór: Evaristo Soares Martins
