Autoridade Bobonaro espera IX Governu rezolve irrigasaun Maliana II no Cailaco
MALIANA, 18 agostu 2023 (TATOLI) – Sekretáriu Autoridade Munisípiu Bobonaro (AMB), João de Fátima do Carmo, hateten postu administrativu Maliana no Cailaco iha bee barak, maibé kondisaun infraestrutura irrigasaun mak ladi’ak no barak mak hetan estragu tanba konstrui iha tempu okupasaun Indonézia.
Ho dezafiu hirak-ne’e munisípiu Bobonaro to’o agora seidauk bele asegura seguransa ai-haan no nutrisaun ho di’ak, tanba hosi mandatu primeiru governu to’o VIII Governu, Ministeriu Agrikultura no Peska seidauk konsege halo intervensaun ba infraestrutura hirak-ne’e.
Notísia relevante: Komunidade Maliana Halerik Kondisaun Estrada-Irrigasaun
“Ita-nia esperansa ba IX Governu bele rezolve, tanba ita hotu hatene katak iha Maliana uluk ema dehan Penghasil padi, beras, maibé agora sai fali pembeli beras,” nia informa asuntu ne’e, iha intervensaun ba abertura atividade validasaun vizaun no planu suku pilotu KONSSANTIL kona-bá seguransa ai-haan no nutrisaun, iha Maliana, kinta ne’e.
João de Fátima konfirma problema refere durante ne’e autoridade munisípiu labele halo asaun tanba governu sentrál la delega kompeténsia mai atu halo reabilitasaun.
Enkuantu Atu responde ba problema ne’e, Adjuntu Prezidente Autoridade ne’e, hatutan Konsellu Nasionál Seguransa Seberania Ai-haan Timor-leste (KONSSANTÍL) mós iha papél importante atu harii banku de água ida iha munisípiu Bobonaro hodi halo prezervasaun ba bee atu nune’e bele ba komunidade agrikultór sira utiliza iha tempu bailoron.
“Ita hare katak Bobonaro tomak kuaze hasoru dezafiu boot mak bee, ita-nia kondisaun infraestrutura, irrigasaun Maliana II hasoru problema boot, ne’ebé ita hare katak rai sira kuaze abandona, depois tinan ida ita halo natar dala de’it, ida fali mós ita hasoru mak peste, entaun ho buat sira-ne’e husu ita atu tulun,” nia katak.
Antes ne’e Diretór Servisu Munisipál Agrikultura munisípiu Bobonaro, Alberto Gomes Lopes, hateten problema ne’e hato’o oa ba diresaun nasionál agrikultura no ortikultura atu halo reabilitasaun ba irrigasaun Maliana II ho distánsia klilómetru neen, hahú hosi mota Malibaka, suku Tapo-Memo ba to’o aldeia Tunubibi.
Irrigasaun refere fornese bee ba natar kuaze ektare 1,800 ne’ebé pertense ba komunidade agrikultór sira hosi suku Tapo-Memo, Saburai no suku Holsa.
Notísia relevante: Agrikultór Tapo-Memo falla kolleta Hare tinan 2023
Jornalista: Sérgio da Cruz
Editór: Evaristo Soares Martins
