Top

Ismael Babo husu loke investigasaun ba membru Polísia deskonfia jura ba partidu

Prezidente Autoridade Protesaun Sivíl, Ismael da Costa Babo. Imajen Tatoli/Francisco Sony

DILI, 18 agostu 2023 (TATOLI)—Prezidente Autoridade Protesaun Sivíl (APC, sigla portugés), Superintendente Polísia, Ismael da Costa Babo, husu autoridade kompetente atu loke prosesu investigasaun ba membru Polísia Nasionál Timor-Leste (PNTL) na’in-56 ne’ebé deskonfia halo juramentu ba partidu.

“Ami sente triste, preokupadu no prejudikadu bainhira públiku espalla informasaun deskonfia ami membru PNTL na’in-56 halo juramentu ba partidu KHUNTO, nu’udar membru kumpre ba superiór irárkia ami sei hein prosesu ruma. Ha’u individuál ezije espera ita-nia na’i-ulun sira loke prosesu, nune’e bele bolu na’in ba partidu ne’ebé ami jura ne’e bele halo esklaresimentu iha Tribunál atu públiku bele hatene no bele klaru ba públiku,” Ismael da Costa Babo, hateten  ba Agência Tatoli, iha areadór edifísiu Farol, sesta ne’e.

Notísia relevante : Xanana husu PNTL serbí de’it povu, labele halo atividade polítiku

Nia dehan, presiza duni loke investigasaun ba nia hamutuk ho nia maluk 15 seluk iha APC tanba kargu ne’ebé sira asume tanba hetan konfiansa hosi Ministériu Interiór no Komandu Jerál, la’ós hosi partidu.

“Ami ba serví APC ne’e depozita konfiansa ba ami liuhosi ami-nia abilidade no kapasidade, liuhosi selesaun no hetan promosaun, tanba promosaun ba diviza ne’e la’ós gratuita ka jura ba partidu. To’o agora laiha partidu ka arte marsiál sé de’it seidauk tula diviza ba ami, maibé Estadu Timor-Leste mak tula diviza ba ami, ida-ne’e ami komunga to’o reforma ka mate,” nia afirma.

Nune’e, nia komprometidu nu’udar sidadaun ne’ebé tama iha Polísia sei dedika-an ho espíritu sakrifísiu onra ba instituisaun ida liuhosi serví ba povu no nasaun.

“Atu dehan katak lista ami-nia naran iha ka laiha ami la hatene, ami hein hela prosesu, iha lista ruma karik ami nu’udar sidadaun iha Konstituisaun Repúblika Timor-Leste (RDTL) fó biban kada individuu ida tenke halo defeza-an ba nia dignidade, maibé ami nu’udar Polísia hakruk nafatin ba ami-nia prinsípiu iha Konstituisaun artigu 147, katak ami la haliis ba grupu ruma, ami serví povu ida-ne’e la halo diskrimisaun tanba atu garantia pás no estabilidade,” Ismael Babo, argumenta.

Nia salienta, hanesan Polísia durante ne’e obdese ba orden superiór tuir irárkia no partisipa atividade vizita kortezia Primeiru-Ministru, Kay Rala Xanana Gusmão, horiseik iha Sentru Formasaun Polísia Comoro, tanba ne’e nia hamutuk ho maluk sira ne’ebé sente prejudikadu sei buka tuir entidade hirak ne’ebé halo relatóriu falsu.

“Ami prontu prosesu ruma buka lia loos, ami hetan duni ema ruma iha kotuk halo manipulasaun ba ami-nia naran no bainhira ami hetan evidénsia sei lori ba Tribunál hodi ezije ami-nia dignidade no husu nia responsabiliza no buka lia loos, tanba ami hanesan PNTL la haliis ba partidu, ami ba serví iha APC la’ós tanba buka diviza ka pozisaun maibé ami ba ne’e iha mandatu ka servisu tuir orden Komandu nian,” membru Polísia ne’e tenik.

Ismael Babo hahú asume knaar nu’udar Prezidente APC iha mandatu VIII Governu nian.

“Serbisu iha Ministériu Interiór la’ós VIII Governu nia tempu, liu-liu individuál, serbisu iha Protesaun Sivíl bainhira Komandante Longuinhos Monteiro ramata ninia mandatu hanesan Komandante Jerál ba asume fali Ministériu Interiór, iha nia tempu mak planu dezenvolve Dirasaun Nasionál Seguransa Rodaviáriu, husu ba Komandante Jerál Komisáriu Júlio Hornai, depozitu konfiansa ba ha’u atu apoiu hanesan Diretór Nasionál Rodaviáriu hodi dezenvolve no ninia rezultadu mak daudaun Polísia Tránzitu sira hahú kobre taxa karreta sira maihosi estranjeiru tama iha fronteira sira ba kofre Estadu,” nia haktuir.

Hafoin ida-ne’e, Ismael Babo filafali ba Ministériu Interiór iha tempu eis Ministru Filomeno da Paixão de Jesus nu’udar Ministru Defeza no Sekretáriu Estadu Protesaun Sivíl, Alexandrino Araújo, husu ba Komandante Jerál atu filafali ba Ministériu Interiór hodi asume Diretór Jerál Protesaun Sivíl, hodi dezenvolve.

Notísia relevante : Governu nomea Ismael da Costa Babo nu’udar Prezidente Autoridade Protesaun Sivíl

Antes ne’e, ho autorizasaun Ministru, Sekretáriu Estadu no Komandante, maka Ismael Babo asume knaar hanesan Diretór Jerál Protesaun Sivíl, ne’ebé aliña ho sistema seguransa nasionál.

“Iha momentu lei orgánika no Autoridade Protesaun Sivíl aprova, ita-nia membru Governu Protesaun Sivíl Sekretáriu Estadu Joaquim Gusmão dos Reis ho Ministru Interiór hanesan mós Primeiru-Ministru sesante Taur Matan Ruak, propoin ema na’in-rua ba Konsellu Ministru ba kargu Prezidente Autoridade Protesaun Sivíl, ikus mai deside ha’u nu’udar Prezidente Autoridade Protesaun Sivíl ba mandatu tinan-haat, agora tinan tolu ona, hela tinan-ida. Agora depende ba Ministru Interiór no Sekretáriu Estadu nomea fali seluk lidera APC, ha’u prontu filafali ba PNTL,” nia adianta.

Jornalista     : Arminda Fonseca

Editora          : Julia Chatarina

Publisidade

Leave a Reply

Latest Post

error: Content is protected !!