SEI: Konstrusaun Estadu presiza feto nia envolvimentu
DILI, 18 agostu 2023 (TATOLI) – Konstrusaun Estadu presiza kotribuisaun hosi ema hotu tantu feto ka mane, grupu vulnerável, hanesan portadór defiénsia sira ne’ebé la haree ba rasa, kór no relijiaun.
Ba Sekretária Estadu ba Igualdade (SEI), Elvina de Sousa Carvalho, nesesita tebes feto nia partisipasaun iha dezenvolvimentu nasionál ida ne’e, tanba atu dudu nasaun ne’e hetan progresu konta mós ho feto sira.
“Kontribuisaun tenke ho másima no ho di’ak tanba dezenvolvimentu ne’ebé sustentável mak dezenvolvimentu ne’ebé envolve ema hotu”, Elvina de Carvalho reitera iha programa entrevista eskluziva ne’ebé realiza iha estúdiu Ajénsia Tatoli, iha Farol.
Sekretária Estadu husu feto maluk sira atu firme no tenke fiar-aan hodi hakat bá oin, liuliu atubele partisipa iha eleisaun ba lideransa komunitária ne’ebé sei akontese iha prósimu outubru.
“Iha ámbitu eleisaun suku, ha’u enkoraja feto maluk sira kandidata-aan ba no esforsu-aan hodi eleita. Ba povu ne’ebé mak atu vota, favór fó konfiansa ba sira atu lidera”, eis dupatada ne’e husu.
Liafuan hanesan mós hato’o antes husi Sekretáriu Administradór Munisípiu Manatuto, Eduardo Guterres, katak feto labele depende liu ba mane, maibé tenke kapasita-aan hodi kompete ho mane sira iha eleisaun ba xefe suku.
Relasiona ho promosaun feto, IX Governu kontinua halo advokásia liuhosi nia programa hodi promove feto atubele partisipa iha vida ekonómika, sosiál, polítika no seluk tan.
Tuir dadus husi Sekretaria Estadu Igualdade no Inkluzaun anteriór, partisipasaun feto sira-nian ba lidera suku entre 2009 no 2016 iha de’it 2% no iha 2016 no 2023 sa’e ba 5% iha-neebe númeru ida-ne’e sai hanesan razaun ba sekretaria no parseiru sira atu hasa’e envolvimentu feto iha tinan 2023-2030 ba 10%.
SEI fó importánsia ba ezisténsia Asosiasaun Feto Potensiál
Aleinde enkoraja feto atu partisipa iha eleisaun suku, Sekretária Estadu ba Igualdade mós nafatin fó importánsia ba ezisténsia Asosiasaun Feto Potensiál iha Timor-Leste.
“Governu nafatin apoia no hakbiit ita-boot sira atubele haforsa fali feto maluk seluk ne’ebé iha poténsia. Iha IX Governu Konstitusionál, SEI nafatin fó importánsia ba iha ezisténsia Asosiasaun Feto Potensiál sira nomós organizasaun ka grupu sira ne’ebé mak harii husi SEI ho razaun katak hotu-hotu nia papél importante ba iha empodera feto sira seluk”, Elvina de Carvalho hatete.
Sekretária Estadu mós husu ba Asosiasaun Feto Potensiál iha munisipiu hodi identifika feto maluk seluk ne’ebé iha kapasidade, tanba sira mak hatene liu saida mak feto sira hasoru iha baze, nune’e bele prepara sira di’ak atu kandidata-aan ba iha eleisaun suku.
“Iha Asembleia Kámara Munisipál tinan oin no SEI apoiu mós orsamentu balun ba Asosiasaun Feto Potensiál Munisípiu sira hodi hala’o atividade no tulun feto potensiál iha munisípiu no suku sira atu enkoraja no kria atividade hirak ne’ebé bele hasa’e sira-nian kapasidade atu partisipa iha eleisaun”, dehan.
Nune’e nia husu atu uza verba ne’e ho transparente, tanba fundu ne’e mak sei determina apoiu sira seluk iha futuru.
Rekorde katak Governu aprova ona data realizasaun asembleia aldeia no konsellu suku iha ámbitu prosedimentu ba eleisaun líder komunitáriu sira.
Konsellu suku ne’e kompostu husi xefe suku, delegadu no delegada aldeia, xefe aldeia sira, lia-na’in no reprezentante juventude suku nian, sira ne’e hotu eleitu ba mandatu tinan hitu.
Notísia relevante: Governu determina data asembleia aldeia no konsellu suku
Jornalista: Osória Marques
Editora: Maria Auxiliadora
