PNDS Oé-Cusse submete ona lista benefisiáriu UNP Plus 269 ba MAE
OÉ-CUSSE 21 agostu 2023 (TATOLI – Diretór Programa Nasionál Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA), Tomas Boquifai, informa, daudaun ne’e identifika benefisiáriu ba Uma Naroman Povu (UNP) Plus, iha sub-rejiaun Pante Makasar hamutuk 269 no submete ona ba Ministériu Administrasaun Estatál (MAE).
“UNP Plus iha ita seidauk implementa, maibé dadus ita identifika ona benefisiáriu ba suku ualu iha sub-rejiaun Pante Makasar mak sei hahú uluk, kada suku unidade 37 ne’ebé totál 296, dadus sira ita submete ona iha nasionál,” Tomas Boquifai ko’alia iha Oé-Cusse, segunda ne’e.
Notísia relevante: PNDS introdús polítika regulár no UNP ba autoridade komunitária Oé-Cusse
Tomas Boquifai, esplika programa ne’e lidera hosi VIII Governu Konstitusionál, nune’e desizaun hotu sei hein hosi IX Governu, tanba projetu UNP Plus kategória sub-programa ne’ebé nia prosesu depende ba desizaun Governu nia lakosaun orsamentu, lahanesan ho programa regulár Uma Naroman ba Povu (UNP).
“UNP Plus ne’e, nia matadalan la hanesan ho UNP, tanba foin daudaun halo alterasaun ba númeru 25/2022, iha mudánsa, tanba antes ne’e identifikasaun mai ho ekipa, enovolve veteranu, autoridade RAEOA, juventude no Ofisiál Polísia Suku (OPS) hamutuk ho autoridade lokál sira,” nia katak.
Maibé ba UNP Plus ne’e, lista kandidatu hotu, identifika direta mai hosi autoridade lokál sira, xefe suku no xefe aldeia, delegadu no delegada sira, submete mai, depois PNDS rejionál tún fila-fali verifika, loos ka lae ema-ne’ebé merese tama iha kritéria UNP Plus ne’e.
“Bainhira ita identifika hotu mak foin submete ba nasionál, tanba nia modelu ne’e la hanesan, UNP regulár ne’e maka hari uma ba kbiit la’ek, maibé UNP Plus fahe kalen ba uma sira-ne’ebé sira-nia kalen ferrujén no ku’ak ona,” nia afirma.
Notísia relevante: MAE-RAEOA selebra MoU reforsa implementasaun PNDS Oé-Cusse
Jornalista: Abílio Elo Nini
Editór: Evaristo Soares Martins
