FFTL rekruta treinadór futsál na’in-rua hosi Indonézia

DILI, 24 agostu 2023 (TATOLI) – Federasaun Futeból Timor-Leste (FFTL) rekruta treinadór na’in-rua hosi nasaun Indonézia hodi fó treinamentu ba selesaun nasionál futsál durante fulan rua.

“Treinadór na’in-rua ne’e mai kaer ita-nia selesaun futsál durante fulan rua de’it hodi prepara ba kualifikasaun Asian Football Confederation (AFC) ne’ebé sei hala’o tempu besik”, Sekretáriu Jerál Assosiasaun Futsál Timor-Leste (AFTL) Fernando Baptista dehan ba Agência TATOLI via WhatsApp, ohin.

Treinadór na’in rua ne’e sei servisu makas ho ekipa selesaun futsál hodi prepara ba kompetisaun AFC ne’ebé sei hala’o iha Manama Baharain ne’ebé hahú iha 07-11 outubru tinan ne’e.

Tuir kalendáriu ne’ebé Timor-Leste okupa iha grupu F hamutuk ho Kwait, Baharain no Brunei Darusalam.

Ho prezensa treinadór na’in-rua ne’e AFTL no FFTL iha esperansa ne’ebé makas ba mudansa signifikativu performe selesaun nasionál futsál nian iha futuru.

Treinadór na’in-rua ne’e mak Fandy Butar hanesan treinad’or prinsipál, M Gilang hanesan treinadór fíziku no guarda rede.

Antes mai Timor-Leste, iha tinan sira ba kotuk treinadór na’in-rua ne’e hanesan mós treinadór ba klube liga pro Indonézia nian Sadakata United.

Kona-ba saláriu treinadór na’in-rua nian, parte FFTL no AFTL labele fó sai ba públiku tanba konsidera konfidensiál.

Jornalista: Hortencio Sanchez

Editór : Zezito Silva