Pe. Ângelo: “Jerasaun kontinuadór presiza transmite valór determinasaun 30 agostu 1999”
DILI, 30 agostu 2023 (TATOLI)—Padre Ângelo Salsinha hateten, kompromisiu no orden ne’ebé luta na’in sira husik hela mak kontinua ba futuru no ba jerasaun foun sira tuir mai, nune’e jerasaun kontinuadór presiza transmite valór, kbiit no forsa ba determinasaun Timor-Leste nian iha 30 agostu 1999.
Notísia Relevante: Xanana husu membru Governu kaer ukun ho umildade-defende povu nia interrese
“Se sentimentu mak hanesan ne’e. Ida-ne’e mak sentimentu kontinuadór transmite valór, hatuur nafatin kbiit no forsa, determinasaun ne’ebé ksolok iha rai ida-ne’e. Ida-ne’e kompromisiu no orden ne’ebé Maromak fó ba ita-nia beiala sira. Nune’e, ohin loron, ita kontinua ba oin. Tanba ne’e, preokupasaun sira-ne’ebé ita halo la dook hosi ne’e. Maromak hanoin ita no fó bensaun mai ita,” Pe. Ângelo Salsinha hateten iha nia ómilia iha misa agradesimentu ba komemorasaun loron konsulta populár 30 agostu 2023, igreja Balide, Dili, kuarta ne’e.
Nia dehan, ida-ne’e koko no grasa Maromak nian ne’ebé haraik ba ema hotu, tanba ema-nia pasu sira, konfiansa sira-ne’ebé atu bele koko no grasa ida-ne’e mak komprimisiu de onra, tanba ne’e komprimisiu fundamental nia baze mak Maromak tanba Maromak mak boot liu sásan hotu-hotu.
Komprimisiu ida-ne’e mak fundamental iha líder sira, ne’ebé Jesus Kristu hanorin nia eskolante sira iha nia misaun ne’ebé nia halo.
“Tanba sai servidór, sara-aan ida-ne’e ezije ita-nia sakrifisiu, ita-nia apliksaun, ita-nia lealdade, ita-nia responsabilidade, mak bolu atan povu nian. Tanba ne’e, presiza servisu ne’ebé produtividade, konesaun, kreativu, servisu komuniaun no servisu ne’ebé produtivu maibé ho fuan ne’ebé la hela de’it iha ne’e maibé nia fuan ba nafatin. Kontinua jerasaun ba jerasaun, trasmisaun estafeta, fó ba malu ne’ebé korente valór no kontinua sustenta hodi valoriza no dignifika imi-nia fuan ba hela nafatin,” nia hateten.
Tanba ne’e, parte hotu-hotu ne’ebé ohin mai iha ne’e hodi kontinua hatutan istória ne’e to’o mundu ramata, no oinsá Maromak hanoin no oinsá Maromak fó bensaun ba timoroan sira.
“Iha opurtunidade sira iha ita-nia kaminada iha nasaun domin Timor-Leste, Maromak hanoin ita, fó mai rain ba ita, rai naran RDTL ne’ebé fó ba ita-nia beiala sira, hodi komunga no ita sira-ne’e kontinua to’o mundu ne’e ramata. Ne’e Maromak hanoin ita mak ne’e,” nia dehan.
Maibé saida mak marka, Maromak haraik bensaun tanba TL nia determinasaun, kontajen, esperitu da luta, esperansa no ksolok iha tempu terus laran ho povu ne’ebé hatene luta, hatene agradese, hatane haraik-aan, ida-ne’e mak Maromak bensaun.
Nune’e, nia dehan, ema ida-idak sai mutun di’ak ba rai doben Timor-Leste, timoroan hotu tenke sai masin no naroman, nune’e timoroan hotu-hotu tenke kontribui nia servisu ba povu nia halerik no tanis.
“Mai ita reza ita ba ita-nia IX Governu Konstituisaun, Na’i Prezidente, Na’i Parlamentu hanorin ita-nia povu ida-ne’e. Maromak haraik bensaun ba ita no ba ita-nia rai doben Timor-Leste,” nia dehan.
Jornalista : Osória Marques
Editór : Cancio Ximenes
