Autoridade Tirilolo finaliza ona reabilitasaun sede suku
BAUCAU, 01 setembru 2023 (TATOLI) – Autoridade suku Tirilolo finaliza ona projeitu Reabilitasaun Sede Suku (RSS) liuhosi programa nasionál dezenvolvementu suku (PNDS).
Xefe suku Tirilolo, Ricardo Ernesto Belo, esplika, atividade refere finaliza iha inisiu fulan-agostu ho durasaun fulan-haat ne’ebé atual utiliza ona hodi halo atendementu ba komunidade.
“Reabilitasaun remata ona, agora ami halao ona serbisu,” Xefi suku Tirilolo informa ba Agência TATOLI iha Vila Antiga, sesta ne’e.
Ricardo Belo, argumenta, ho reabilitasaun sede suku bele fasilita serbisu administrasaun liuliu enkontru nivel konsellu suku inklui trasa planu ne’ebé fahe ba fatin serbisu xefe suku, sekretáriu, PNDS no salaun enkontru.
Sede suku refere konstrui iha tempu okupasaun Indonézia ne’ebé konsideradu hetan estragu no presiza reabilita liuliu kondisaun kalen, odamatan, janela no didin.
Total orsamentu ba projeitu refere hamutuk rihun $13-resin ne’ebé aloka ba item tolu hanesan kustu badaen, materiál lokal no fabrika.
Suku Tirilolo kompostu aldeia neen hanesan Betulale, Caisido, Lutumutu, Lialailesu, Parlamentu no Osso-ua ho tótal populasaun hamutuk 9.789 hosi uma-kain hamutuk 2.031.
Jornalista : Natalino Belo
Editór : Evaristo Soares Martins
