COVALIMA, 11 setembru 2023 (TATOLI)-Diretór Interiñu Programa Dezenvolvimentu Suku (PNDS), munisípiu Covalima, Pedro de Araújo Gomes, relata progresu konstrusaun fiziku Uma Naroman ba Povu +A iha postu administrivu Maucatar, to’o fulan-juñu 2023 ne’e atinje ona pursentu 62.
“Bazeia relatóriu ne’ebé ami simu iha fulan-juñu katak konstrusaun Uma Naroman ba Povu (UNP) + A implementa iha postu administrativu Maucatar ho totál unidade 75, ninia progresu atinji ona 62% ne’ebé seidauk inklui relatóriu fulan-jullu ho agusto nian,” Pedro de Araújo Gomes, hateten ba Agência Tatoli, iha ninia servisu fatin, foinlalais ne’e.
Notísia Relevante :MAE inaugura Uma Naroman ba Povu iha Manatuto
Tuir relatóriu ne’e katak prosesu konstrusaun UNP+A iha Maucatar besik tama ona iha faze finalizasaun, tanba to’o loron ikus fulan-juñu ne’e badaen sira taka ona zinco.
Nune’e nia fiar katak projetu ne’e sei finaliza antes tinan 2023 remata tanba relatóriu fiskalizasaun fulan-jullu no agostu nian sei iha prosesu verifikasaun dadus.
Antes ne’e, Xefe Suku Belekasak, postu administrativu Maucatar, Leonito Gusmão, hateten hosi UNP+ A unidade 75 ne’e implementa iha suku Belekasak hamutuk unidade 19, suku Holpilat 19, Matai 19, Suku Ogues 18.
Notísia Relevante :Benefisiáriu UNP+ B 131 iha Zumalai troka ona zinku feruzen
Jornalista: Celestina Teles
Editór: Agapito dos Santos
