COVALIMA, 04 setembru 2023 (TATOLI)–Diretór Interinu Programa Nasionál Dezenvolvimentu Suku (PNDS) munisípiu Covalima, Pedro de Araújo Gomes, hateten benefisiáriu 131 Uma Naroman ba Povu Plus B (UNP+ B) iha postu administrativu Zumalai, munisípiu Covalima troka ona zinku feruzen.
Notísia Relevante: MAE distribui zinku ba benefisiáriu UNP+ B 185 iha Covalima
“Uma Naroman ba Povu Plus B ne’ebé implementa iha postu administrativu Zumalai iha suku ualu (8) hamutuk benefisiáriu 222, hosi ne’e benefisiáriu 131 troka ona zinku no falta ita-nia benefisiáriu 91 seidauk troka zinku,” Pedro de Araújo Gomes hateten ba Agência Tatoli, segunda ne’e.
Benfisiáriu UNP+ B 91 seidauk troka zinku tanba Governu oferese de’it zinku ba benefisíariu sira la fó ai ho pregu, nune’e benefisíariu sira sei koa ai molok atu troka zinku feruzen.
Tanba ne’e, nia dehan, loloos hafoin benefisíariu sira simu ona zinku hosi Governu sira tenke troka kedas kalen, maibé agora tama ona fulan tolu to’o ohin loron balun seidauk troka ho razaun seidauk koa ai.
Benefisáriu ne’ebé benefisía ba Uma Naroman ba Povu Plus B iha postu Zumalai implementa iha suku ualu (8) ho totál benefisiáriu 222.
Postu Administrativu Zumalai ho nia suku sira hanesan suku Tashilin totál benefisiáriu 37, hosi númeru uma-kain 35 troka ona zinku, uma-kain rua seidauk troka, Suku Raimea totál 33 ne’e troka ona zinku uma-kain 23, seidauk troka 10, suku Zulo totál uma-kain 37 mak troka ona zinku uma-kain-35, uma-kain rua (2) seidauk troka.
Suku Lour benefisiáriu 37 ne’ebé troka ona zinku uma-kain 18, seidauk troka uma-kain 19, suku Lepo 24 troka ona uma-kain hitu (7), seidauk troka uma-kain 17, suku Mape uma-kain 19 no troka zinku uma-kain tolu (3), seidauk troka uma-kain 16, suku Usekai iha uma hitu (7), troka ona zinku uma-kain rua (2) no seidauk troka uma-kain lima (5), suku Fatuleto uma-kain 28 troka ona uma-kain ualu (8) no seidauk troka uma-kain 20.
Antes ne’e, iha loron 02 fulan-Fevreiru 2023, eis Ministru Administrasaun Estatál (MAE), Miguel Pereira de Carvalho, akompaña hosi eis Vise Ministru Administrasaun Estatál distribui kalen Uma Naroman ba Povu Plus B (UNP+ B) ba benefisiáriu uma-kain 185 iha postu administrativu Suai, munisípiu Cvalima.
Implementasaun programa Uma Naroman ba Povu Plus B ne’ebé implementa iha postu administrativu Suai, iha suku lima (5) ba uma-kain 185.
Programa UNP+ B ne’e, Governu implementa iha postu Suai, munisípiu Covalima iha suku sira hanesan Camanasa, Suai Loro, Debos, Beco no Labarai.
Jornalista : Celestina Teles
Editór : Cancio Ximenes
