DILI, 12 setembru 2023 (TATOLI) – Organizasaun internasionál naun-governamentál Marry MacKillop Today (MMT) mai ho vizaun atu ajuda labarik sira liuhusi edukasaun no asisténsia umanitária. Halo mós intervensaun direta iha edukasaun formál iha eskola públika no área remota. Ho vizaun ida ne’e MMT liuhusi parseria ho Ministériu Edukasaun (ME) promove ona alfabetizasaun tetun ba manorin no inan-aman hamutuk 3.906 iha munisípiu sira.
Organizasaun australiana ne’e iha programa edukativu ne’ebé mak foka iha área hanesan alfabetizasaun, formasaun ba profesór sira, Programa Formasaun Inan-Aman no sentru aprendizajen móvel.
Diretór-Ezekutivu MMT, Alípio Baltazar, hatete formasaun iha dalen tetun ne’e ba profesór no inan-aman sira iha Viqueque, Manufahi, Ermera no Liquiçá tuir padraun Institutu Nasionál Linguístika (INL) nian.
“MMT implementa nia Programa Literasia Edukasaun no Saúde iha Timor-Leste husi 2017-2023. Husi benefisiáriu 3.906 [manorin 894 no inan-aman 2.501] konsege komprende ho didi’ak Literasia Tetun tuir padraun INL. Programa ida ne’e importante tebes ba inan-aman sira ne’ebé maka la komprende letra atubele hatene hodi ajuda fali sira-nian oan molok tama eskola”, dehan.
Alípio Baltazar hatutan formasaun tetun ba manorin sira iha pré-eskolár no ensinu báziku sira iha área remota ne’e atu kapasita sira nune’e bele garante prosesu aprendizajen ida kualidade iha aula laran.
Lembra katak Prezidente Repúblika, José Ramos Horta, antes ne’e husu, iha ámbitu hasoru malu iha Palásiu Governu, ba Mary MacKillop Today atu promove alfabetizasaun tétum iha país
MMT alein de promove alfabetizasaun de tétum, instituisaun refere apoia mós promosaun kultura lee liuhusi espozisaun kulturál iha Ataúro, Baucau e Manufahi.
Notísia relevante: Mary Mackilop disponibiliza formasaun ba manorin 578 iha munisípiu tolu
Jornalista: Tomé Amado
Editora: Maria Auxiliadora
