BAUCAU, 13 setembru 2023 (TATOLI) – Polísia Nasionál Timor-Leste (PNTL) husu organizasaun arte-marsiál no rituál atu hatudu konfiansa ba governu liuhosi kontribui pás no estabilidade iha Timor-Leste.
Segundu Komandante PNTL, Komisáriu Polísia, Pedro Belo, husu ba juventude sira-ne’ebé envolve iha OAM no organizasaun arté ritúal (GAR) atu relembra fali prosesu hotu kona-bá reativasaun organizasaun númeru 4/2020 kona-ba reativa atividade tanba govenu fiar bele hasa’e mentalidade joven liuhosi formasaun.
“Presiza ita-boot sira-nia kontribuisaun no serbisu maka’as hodi responde ba situsaun hotu, tenke iha komitmentu katak hatudu ba governu liuhosi kontribusaun boot ba pás no dame iha ita-nia rai,” Segundu Komandante PNTL hateten iha Sentru Konvensaun Baucau (CCB, sigla portugés), Vila Antiga, kuarta ne’e.
Antes ne’e governu fÓ-sai rezOlusaun númeru 17/2013 kona-ba desizaun taka tanba hakarak situsaun hakmatek nune’e hafoin reativa husu atu mantein konfiansa liuhosi komportamentu di’ak iha komunidade nian leet.
Pedro Belo, argumenta, hosi perspetiva seguransa nian iha era globalizasaun liuliu kona-bá planu adezaun Timor-Leste ba ASEAN maibé presiza asegura estabilidade iha área ekonomia, polítika, sosiál, kultura no seguransa rasik ne’ebé kontinua enfrenta liuhosi hahalok hodi afeta ba estabilidade hodi halo komunidade la hakmatek.
Nia hateten, haree hosi perspetiva geopolítika Timor-Leste iha poténsia boot liuliu iha tasi ne’ebé sai fatin sentru komersiál hodi halo investementu ne’ebé interligadu ho ASEAN, Índia no Oeseanu-pasífiku.
“Xave ba buat sira-ne’e mak estabilidade iha rai-laran hodi kontribui nune’e investimentu hosi rai liur iha ita-nia rai no rekursu preparadu kompete no nasaun seluk,” Pedro Belo argumenta.
Totál organizasaun arte-marsiál ne’ebé rejista sub KRAM Baucau hamutuk neen kompostu PSHT, IKS, KORK, Padjajaran, Persai Diri, Ths-THM no Seruling Dewata.
Jornalista : Natalino Belo
Editór : Evaristo Soares Martins
