BAUCAU, 14 setembru 2023 (TATOLI) – Autoridade suku Baguia, postu administrativu Quelicai, munisípiu Baucau, bandu komunidade atu konstrui uma iha rai estadu.
Xefe suku Baguia, Hermenegildo Ximenes, esplika, antes ne’e iha tinan-2016 Terra Propiedade munisípiu liuhosi serbisu kadastrál halo ona levantamentu ba rai ne’ebé konsideradu nu’udar patrimóniu estadu, maibé to’o agora sertifikadu rai seidauk fó-sai nune’e hamosu dezintendimentu iha fatin tanba komunidade balun hahú inisia konstrui uma iha rai refere.
“Agora daudaun iha pesóal balun halo konstrusaun uma, ha’u halo impedimente tanba bazea ba mapeamentu hosi diresaun tera propiedade fó ona katak área refere sai patrimóniu estadu,” Xefe Suku Baguia ko’alia iha Vila Antiga, kinta ne’e.
Hermenegildo Ximenes, argumenta, problema iha suku la’ós de’it hosi joven sira-ne’ebé envolve iha arte-marsiál maibé kazu violénsia doméstika no disputa rai sai mós problema iha suku refere.
Rai ne’ebé autoridade bandu tuir planu futuru sei harii edifísiu hosi autoridade postu Quelicai maibé deskonfia iha membru Polísia Nasionál Timor-Leste (PNTL) balun mak hahu konstrui uma privadu.
Nune’e autoridade suku husu ba komandu PNTL nasionál, munisípiu no eskuadra postu Quelicai atu fó hanoin ba membru refere atu hapara konstrusaun uma hodi hein desizaun hosi Tribunál.
“Bainhira rai refere sai patrimóniu privadu sei hamosu problema boot iha iha suku Baguia tanba geografiamente postu Quelicai sei harii iha-ne’ebá,” Hermenegildo Ximenes akresenta.
Líder komunitária ne’e husu ba terra no propiedade munisípiu Baucau atu planeia monta estaka ka sinál balun iha rai estadu nune’e prevene komunidade kontrui uma iha rai estadu.
Suku Baguia iha aldeia tolu kompostu Butileo, Laua-liu no Saraida ho totál populasaun 1.456.
Jornalista : Natalino Belo
Editór : Evaristo Soares Martins
