Komunidade preokupa jogu bola guling loke livre iha Oé-Cusse.
OÉ-CUSSE, 15 setembru 2023 (TATOLI – Constâncio Suni, hosi suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) husu ba IX Governu atu regulariza jogu ilísitu sira hanesan kuru-kuru no bola guling.
Tuir nia haree, tanba durante sidadaun balu loke livre iha fatin públiku, nune’e konvida labarik sira hodi partisipa, bele estraga labarik sira-nia futuru hodi foku ba atividade edukasaun.
Constâncio Suni, ko’alia asuntu ne’e iha ámbitu enkontru ho Prlamentu Nasionál Komisaun C, iha salaun administrasaun Oé-Cusse, kinta ne’e.
“Jogu iha Oé-Cusse livre liu, sé livre liu afeta ba ami-nia oan sira, balu ba eskola, bele aprende na’ok-teen ka bele aprende sai badiu tanba jogu sira-ne’ebé foin daudaun autoridade loke iha loron konsulta popular ne’e livre liu,” nia informa.
“Sekuandu kuru-kuru no bola guling, loke iha estrada ibun ka fatin públiku hanesan foin daudaun iha Palaban, ne’e impkatu boot ba labarik sira nia futuru, ne’e realidade, ha’u mós husu ba Parlamentu Nasionál, tenki kria lei ida, bandu sé mak loke iha fatin públiku tenki multa,” nia husu.
Presidenti Komisaun C (Finansa Públika, Deputada Cedelizia dos Santos, hateten kona-bá jogu livre, ida-ne’e la’os iha Oé-Cusse, maibé iha Díli mós, kuaze iha fatin-fatin jogu ne’e livre tebes, ema hotu preokupa, bele fó impaktu ladi’ak ba jerasaun tuir mai.
“Ko’alia ba reseita, hosi Ministériu Finansa, hosi ami-nia karik, kuandu loke ida-ne’e hatama reseita ba Estadu, maibé reseita ida ho oinsa, reseita ida depois destroi fali ita-nia oan sira-nia futuru, ha’u hanoin ita hotu la konkorda, tan ne’e ha’u hanoin preokupasaun sira-ne’e, iha plenária mós deputada sira levanta, ami mai rona tan hanesan ne’e, di’ak liután sai hanesan baze ba mai atu ko’alia ba Governu atu haree kona-bá kestaun sira-ne’e,” nia esplika.
Jornalista: Abílio Elo Nini
Editór: Evaristo Soares Martins
