BAUCAU, 18 setembru 2023 (TATOLI) – Ensinu Báziku Filiál (EBF) Lutumutu, suku Tirilolo menus fasilidade hanesan edifísiu ba manorin-na’in sira.
Koordenadór Eskola Ensinu Báziku Filiál Lutumutu, Tirilolo Baucau, Artur Soares, esplika, kondisaun eskola refere menus sala aula nune’e dirijente deside utiliza varanda ba eskritóriu profesór liuliu administra serbisu eskola nian.
“Ami-nia pedidu ba Governu atu hadi’a tiha eskola ne’e, liuliu oinsá kria kondisaun ne’ebé di’ak hanesan aumenta sala aula,” Koordenadór EBF Lutumutu hateten iha Vila Nova, segunda ne’e.
Kondisaun refere fó impkatu ba prosesu aprendijazen tanba sala aula la sufsiente nune’e hamosu preokupasaun liuliu kualidade ensinu ba estudante sira.
Eskola refere hahú konstrui iha tinan-2010 ho tipu semí-permanente hosi Ministériu Edukasaun no didin ho bebak ne’ebé komesa hetan estragu nune’e fó ameasa ba estudante sira bainhira halo movimentu.
“Eskola seluk ne’ebé harii hamutuk hetan ona reabilitasaun enkuantu eskola ne’e to’o agora seidauk hetan atensaun,” Artur Soares akresenta.
Totál estudante iha EBF Lutumutu, Tirilolo, postu Baucau Vila hamutuk na’in-191, komposta hosi primeiru-anu to’o sestu-anu ho totál profesór hamutuk 12 hanesan tempu parsiál na’in-rua no na’in-sanolu funsionáriu permanente.
Jornalista : Natalino Belo
Editór : Evaristo Soares Martins
