Projetu PDIM iha Baucau atinje 23%
BAUCAU, 19 setembru 2023 (TATOLI) – Projetu hosi Programa Dezenvolvimentu Integradu Munisipál (PDIM) hamutuk tolu iha Baucau atinje ona 23,27%.
Diretór PDIM Baucau, Hermenegildo Rodrigues Fraga, esplika, razaun progresu atinjimentu foin pursentu 23,27 tanba projetu hirak-ne’e hahú konstrusaun tarde hafoin asina kontratu iha fulan-marsu tinan-ne’e.
“Kompañia sira serbisu tuir dezeñu no Bill of Quantity (BoQ) liuliu faze implementasaun la’o tuir nafatin matadalan ka espesifikasaun hosi tékniku autoridade prepara,” Diretór PDIM Baucau hateten iha Vila Nova, tersa ne’e.
Progresu ba kada projetu tolu hanesan konstrusaun edifísiu foun patrimóniu lojístika munisipal atinje pusentu 19,5, reabilitasaun edifísiu administrasaun postu Baucau Vila atinje 25,08% no kontrusaun edifísiu servisu Munisipál edukasaun Baucau atinje pursentu 25,20.
Projeiru tolu refere kompostu hosi konstrusaun edifísiu foun patrimoniuu lojístika Munisipál hosi kompañia Lanisia Unip.Lda, reahabilitasaun eis edifísiu administrasaun postu Baucau Vila hosi kompañia Olhão Unip.Lda no konstrusaun edifísiu servisu munisipál edukasaun Baucau responsável hosi kompañia Caidaralata Unip.Lda.
Hermenegildo Fraga kontinua husu ba kompañia responsável atu aselera porojetu liuhosi enkontru ho kada responsável kompaña nune’e bele konklui tuir data kontratu ne’ebé determina.
“Ami hein Kompañia finaliza tuir durasaun tempu, maibé bainhira latuir tarjetu entaun sei kona sansaun hanesan durante tinan-rua sei la tuir prosesu aprovizionamentu ka pra-kualifikasaun iha munisípiu,” Hermenegildo Fraga akresenta.
Munisípiu Baucau aloka totál orsamentu iha tinan fiskal 2023 ba programa PDIM hamutuk $ 648. 324,61 ne’ebé aloka ba projetu patrimóniu lojístika hamutuk $ 105.109, 38, reabilitasaun edifísiu administrasaun postu Baucau Vila $94.282 no konstrusaun edifísiu edukasaun Baucau hamutuk $448.932, 54.
Jornalista : Natalino Belo
Editór : Evaristo Soares Martins
