DILI, 19 setembru 2023 (TATOLI)-Ministru Justisa (MJ), Amandio de Sá Benevides, hateten Governu hamutuk ho ekipa anti money loundering terrorist financing halo hela avaliasaun kona-ba esforsu Timor-Leste atu oinsá kombate no prevene kazu brankamentu kapitál no finansiamentu terorizmu.
“Ohin komesa halo ona avaliasaun ba Timor-Leste nia komprimentu ba efetividade hotu ne’ebé ita-nia esforsu atu kombate brankamentu kapitál no atu kombate finansiamentu terorizmu,” Ministru Amandio de Sá Benevides, hateten ba jornalista sira iha edifisiu Ministeriu Negósiu Estranjeiru no Kooperasaun (MNEK) Dili, tersa ne’e.
Notísia Relevante :UIF selebra ona akordu ho organizasaun rejionál 22 kombate krime brankamentu kapitál
Timor-Leste sai ona membru Ázia pasifiku forum ba anti money loundering terrorist financing iha jullu 2008, no iha tinan 2015 liubá Timor-Leste hetan ona avaliasaun hodi haree fila-fali saida maka Timor-Leste kumpre ona no seidauk hodi implementa diakliután iha futuru.
Nia hatutan atu implementa ho di’ak liután servisu sira ne’ebé maka ligadu ho problema brankamentu kapitál liuliu atu kombate finansiamentu terorizmu maka daudaun ne’e ekipa husi anti money loundering terrorist financing hosi Austrália kompostu ema na’in-10 halo hela avaliasaun ba Timor-Leste ninia rejime juridiku, instrumentu legál no seluk tan atu ita uja hodi halo atuasaun ba krime rua ne’e.
“Avaliasaun ne’e importante tebes ba Timor-Leste oinsá ita-nia rejime legál-sira kona-ba oinsá atu halo prevensaun kontra brankamentu kapitál no finansiamentu ba terorizmu,” nia hateten.
Kona-ba kazu ne’e, Governante ne’e hateten to’o oras ne’e Timor-Leste seidauk rejista kazu brankamentu kapitál no finansiamentu terorizmu ne’ebé akontese iha rai-laran tanba Banku Sentrál Timor-Leste, iha unidade informasaun finanseira ne’ebé ninia servisu maka atu kontrola aktu krime ne’e.
Iha fatin hanesan Diretóra Unidade Finanseiro Banku Sentral Timor-Leste, Maria José Sarmento, hateten Timor-Leste iha ona lei ba anti brankamentu kapitál no finansiamentu terorizmu ne’ebé tama vigór iha 2011.
“Bazeia ba lei ne’ebé iha Governu Timor-Leste estabelese komisaun nasionál ne’ebé lidera hosi Ministru Justisa no Ministru Negósiu Estranjeiru no Kooperasaun ho nia membru hamutuk ema na’in-15 inklui Governadór Banku Sentrál, Ministra Finansa, Ministru Interiór, Komandante Jerál Polisia Nasionál Timor-Leste (PNTL) no seluk tan hamutuk ema na’in-15,” nia dehan.
Timor-Leste hanesan membru ba Azia pasifiku naturalmente tenke iha obrigasaun hodi implementa programa rejionál sira, ida mak halo avaliasaun mutuál ne’ebé halo direita hosi ekipa anti brankamentu kapitál hosi Ázia pasífiku.
Tuir regra prosesu avaliasaun ne’e halo ba faze rua tanba iha tinan 2011 to’o 2012 ekipa internasionál halo ona avaliasaun no rekomenda Timor-Leste atu hadi’a diakliután sistema anti brankamentu kapitál no finansiamentu terorizmu.
“Ida agora ne’e sira mai ba dalarua nian atu haree fali progresu sira ne’ebé Timor-Leste halo atu kumpre padraun internasionál sira ne’ebé fó ona, maibé ita Timor-Leste iha risku ba krime rua ne’e hanesan korupsaun, fraude no tráfiku umanu tanba sira ne’e fó orijén ba brankamentu kapitál, maibé ita iha asaun atu foti hasoru krime hirak ne’e,” nia hateten.
Durante ne’e, nia esplika ekipa Ázia pasífiku fó rekomendasaun hamutuk 40 ba Timor-Leste maioria mak kumpre ona tanba rekomendasaun hirak ne’e foku liu ba aréa jurídiku nian mak hanesan estabelesimentu Polisia Sientífiku Kriminál no seluk tan.
Notísia Relevante :UIF sei introdús lei anti brankamentu kapitál no finansiamentu terrorizmu iha RAEOA
Jornalista: Hortencio Sanchez
Editór : Agapito dos Santos
