Autoridade munisípiu sei hapara atividade negósiu dalan-ninin iha Bobonaro
BOBONARO, 21 setembru 2023 (TATOLI) – Autoridade Munisipál Bobonaro, lideradu hosi Ernesto de Oliveira Barreto, orienta ona administradór postu sira koordena ho autoridade seguransa no líder komunitária atu kontrola no hapara negosiante sira iha postu administrativu Bobonaro ne’ebé kada loron-sábadu sempre halo atividade negósiu iha dalan-ninin.
Ernesto de Oliveira Barreto, informa, asaun refere bazea ba dekretu-lei númeru 33/2008 kona-bá iijene orden públika, tanba konsidera negosiante sira okupa espasu públiku hodi halo atividade negósiu liuliu iha merkadu Bobonaro Vila.
Nia konfirma, iha tempu badak Sekretariu Estadu Asuntu Toponímia no Organizasaun Urbana, sei halo vizita hodi haree asuntu ne’e.
“Ita-nia bazar ne’e hosi Igreja tún mai ne’e, tenke mamuk, labele bazar iha-ne’e, ladi’ak, muda ba leten, hahú sábadu tuku ha’u mai, seguransa sira, koopera ho Polísia halo servisu iha bazar laran, ema labele bazar, tanba saida? loron ruma karreta hanehan ema mate, ne’e oinsa,” nia hateten asuntu ne’e iha salaun administrasaun postu Bobonaro, kuarta ne’e.
Nia orienta ona ba administradór postu Bobonaro no xefe suku Oeleu, atu fó xamada ba negosiante sira iha merkadu lokál Ilibole, tanba konsidera kontra lei ijiene orden públika.
Enkuantu atividade ne’e sei halo mós iha postu administrativu lima seluk hanesan, Atabae, Balibó, Cailaco, Maliana no Lolotoe.
Notísia relevante: Postu Balibo sei loke bazár kalan-kafé Liberdade
Jornalista: Sérgio da Cruz
Editór: Evaristo Soares Martins
