Postu Balibo sei loke bazár kalan-kafé Liberdade
MALIANA, 20 juñu 2023 (TATOLI) – Administrasaun postu administrativu Balibo, munisípiu Bobonaro, sei loke bazár kalan no kafé liberdade ba publiku iha arreadór monumentu integrasaun Balibo nian atubele hasa’e rendimentu ekonomia lokál.
Administradór postu administrativu Balibo, Amilcar Tavares, heteten daudaun ne’e liuhosi Programa Mão de Obra Postu Administrativu (PMOPA), traballadór sira hahú kria ona kondisaun atu estabelese jardín ida hodi fó oportunidade ba negosiante lokál sira atu halo sira-nia atividade negósiu.
Notísia Relevante:PMOPA faze daruak iha Balibo prioritiza setór agrikultura
“Fulan ida tán ita bele halo lansamentu, atubele hetan retorunu ba komunidade, ita tau jardín ne’e di’ak, bee iha, ahi-oan di’ak, ita pinta halo didi’ak, ema mai, ami la fasilita hahaan, imi mai sosa hahaan ne’ebé ami-nia komunidade sira prepara,” nia informa ba Tatoli, iha kna’ar-fatin, segunda ne’e.
Nia dehan, bainhira kondisaun hirak-ne’e funsiona di’ak ona, sei serbisu hamutuk ho Programa Nasionál Dezenvolvimentu Suku (PNDS) hodi fó apoia atu distribui ba negosiante sira instala iha bazjár refere.
“Ita loke bazár ne’e hahú tuku 17:00 ka tuku 20:00 kalan, nia kafé liberdade iha-ne’ebá asesu mós internete gratuita iha-ne’ebá, entaun ema hosi hosi Dili tuur iha-ne’ebá hemu kafé, haan hahaan ikan ho bakar katupa, ayam potong ruma, osan ne’e monu ba komunidade sira,” nia katak.
Antes ne’e, nia parte husu apoia hosi empreza Miramar no Pelican Paradise apoia solár sel unidade 30 instala haleu Balibo Vila nune’e bele fasilita komunidade hala’o viajen ho halo atividade iha tempu kalan ho livre.
Nune’e mós serbisu hamutuk ho diresaun servisu agrikultura munisípiu Bobonaro kuda ona ai-kameli 300-pes resin iha árreadór benteng hodi sai hanesan icon Balibo.
Enkuantu postu administrativu Balibo iha área luan 296 km2 ho totál suku neen, aldeia 27. No populasaun tuir dadaus 2021 hamutuk 19,869, komposta hosi feto 9,833, mane 10,036 ho totál uma-kain 4,708.
Notísia relevante: MOP sei halo manutensaun estrada Batugade-Balibo to’o Maliana
Jornalista : Sérgio da Cruz
Editór : Evaristo Soares Martins
