Ministériu Saúde husu klínika privadu kumpri enkuadramentu legál
BAUCAU, 22 setembru 2023 (TATOLI) – Governu liuhosi Ministériu Saúde (MS) husu klínika privadu no profisionál saúde sira iha munisípiu Baucau atu kumpri enkuadramentu legál sira-ne’ebé estadu Timor-Leste estabelese ona.
Diretór Gabinete Lisensamentu Rejistu Atividade Saúde Ministériu Saúde (GLRAS-MS), Carlito Correia Freitas, esplika, liuhosi atividade fahe informasaun rútina atu setór privadu, parseiru dezenvolvimentu, akadémiku no profisionál saúde sira bele kumpri no komprende kona-ba enkuadramentu legál ligadu ho kompeténsia Ministériu Saúde nian.
“Too agora setór privadu sira ita kontrola ho di’ak no sira kumpri ita-nia baze legál ne’ebé iha ona,” Diretór GLRAS-MS hateten iha Vila Antiga, sesta ne’e.
Enkuadramentu legál ne’ebé presiza kumpri mak hanesan dekretu-lei númeru 3/2019 ne’ebé hetan alterasaun dekretu-lei númeru 53/2020 ne’ebé fó kompeténsia ba GLRAS-MS hanesan fó-sai lisensa ba importansaun no esportasaun ai-moruk no ekipamentu saúde.
Alende ne’e, fó-sai lisensa atividade ba unidade privadu saúde hanesan konsultór médiku, klínika, laboratóriu, farmásia no asisténsia parteira inklui halo rejistu ba profisionál saúde tantu estranjeiru no nasionál tenke halo rejistu iha ninistériu.
Enkuadramentu legál seluk tán mak hanesan dekretu-lei númeru 48/2020 kona-ba ezersísiu profisionál saúde sira ligadu ho knaar no funsaun inklui dekretu-lei númeru 86/2020 kona-bá kareira profisionál saúde.
Ministériu Saúde mós regula kona-ba atividade médiku hanesan fa’an ai-moruk liuhosi meiu online atu aprosima hodi halo rejistu ba lisensa mesmu hasoru difikuldade atu deteta atividade refere.
“Ita esplika atu unidade privadu sira bele komprende kona enkuadramentu legál sira-ne’e,” Carlito Freitas hateten.
Nia argumenta, ministériu saúde mos fó-sai autorizasaun ba tabako ne’ebé importa hosi rai-li’ur tuir dekretu-lei rejime kontrola tabako ne’ebé fó kompeténsia atu halo clearing iha alfándenga bainhira iha ona portu tuir rekizitu ne’ebé estabelese ona.
Ministériu Saúde sei fó sansaun inklui koima ba unidade privadu sira, bainhira la kumpre enkuadramentu legál ne’ebé estabelese tuir dekretu-lei númeru 23/2022 kona-ba infrasaun no koima hanesan osan hosi montante $ 1.000 too $ 5.000.
Tuir dadus nasionál hosi GLRAS-MS unidade privadu ne’ebé hetan lisensa ba importansaun ai-moru hamutuk 36 no lisensa hamutuk 96 ba unidade privadu saúde ne’ebé halo atividade saúde iha territóriu nasionál.
Jornalista : Natalino Belo
Editór : Evaristo Soares Martins
