Autoridade Baucau propoin rihun $315 ba realizasaun eleisaun suku
BAUCAU, 25 setembru 2023 (TATOLI) – Autoridade Administrasaun Munisipál Baucau, propoin orsamentu ho montante rihun $315 ba nasionál hodi realiza eleisaun suku iha fulan-outubru.
Sekretáriu Administrasaun Munisipál Baucau, Simão dos Santos Marques Pinheiro, esplika, liuhosi proposta orsamentu ne’ebé autoridade munisípiu prepara no hato’o pedidu ba nasionál sei aloka ba STAE Baucau kona-bá tékniku eleisaun no alokasuan ba autoridade hodi prepara kondisaun hasoru eleisaun suku.
“Ida-ne’e hanesan pedidu hosi autoridade maibé depende hosi nasionál, kuandu la to’o ita nafatin ezekuta tuir kapasidade orsamentu,” Sekretáriu Administrasaun munisipál informa Agência TATOLI bainhira partisipa iha sensibilizasaun kona-bá eleisaun suku iha Buruma, segunda ne’e.
Autoridade Baucau sei utiliza rekursu ne’ebé iha hodi fó susesu ba eleisaun komunitária refere bainhira proposta orsamentu ne’ebé hato’o ba nasionál la hetan responde másimu.
Autoridade Baucau hala’o ona sensibilizasaun ba kada postu administrativu hamutuk neen liuhosi forma ekipa komposta hosi munisípiu no nasionál hanesan Ministériu Administrasuan Estatál (MAE) no Sekretariadu Tékniku Administrasaun Eleitorál (STAE) elabora ona planu.
Matéria ne’ebé sosializa mak hanesan sosializasaun dekretu-lei númeru 9/2026 kona-bá xefe suku, dekretu governu númeru 23/2016 no regulamentu governu númeru 14/2016 liuliu preparasaun eleisaun suku tinan-ne’e.
Alende ne’e, ekipa refere kontinua halo sosializasaun kona-ba mekanismu eleisaun hanesan rekizitu administrasaun kona-bá prosesu rejistrasaun ba kandidatura xefe suku, aldeia no membru konsellu suku liuliu ba postu administrativu ne’ebé suku barak iha Baucau.
“Ha’u fiar katak sei susesu tanba iha ekipa munisípiu no nasionál tanba ne’e eleisaun sei realiza ho di’ak,” Simão Pinheiro akresenta.
Preparasaun seluk mak ekipa tékniku sei fó formasaun ba membru asembleia suku no aldeia sira-ne’ebé antes ne’e STAE munisípiu hala’o ona rekrutamentu nune’e prepara di’ak liután hanesan simu kandidatura no implementasaun elesuan iha loron-28 outubru.
Xefi suku Buruma, Liborio dos Santos Freitas, hateten, komunidade iha suku hein sosializasaun nune’e bele hetan informasaun antes realizasaun eleisaun suku.
“Dalabarak komunidade akompaña de’it hosi mídia maibé informasaun seidauk klaru, maibe fiar katak ho sosializasaun ne’e bele hetan informasaun ho loloos,” Liborio Freitas hateten.
Munisípiu Baucau tuir planu sei realiza eleisaun iha suku hamutuk 62 hafoin iha tinan-ne’e aumenta suku foun tolu hosi totál postu administrativu neen hanesan Baucau Vila, Baguia, Laga, Quelicai, Venilale no Vemasse.
Jornalista : Natalino Belo
Editór : Evaristo Soares Martins
