Konfrontu iha Triloka rezulta xefe aldeia kanek
BAUCAU, 25 setembru 2023 (TATOLI) – Kazu konfruntu entre joven iha suku Triloka, postu Baucau Vila, rezulta xefe aldeia Macadae, suku Triloka kanek grave tanba tenta buka solusaun ba konfrontu ne’e.
Segundu Komandante Polísia Nasionál Timor-Leste (PNTL) Baucau, Superintendente Asistente, José Casemiro, esplika, kazu refere akontese iha loron-sesta, 24 setembru bainhira vítima inisiál DBS hafoin lori fila nia tia ho motorizada hetan atake iha aldeia Macadae hosi joven na’in-rua.
“Vítima DFS kondisaun grave no agora transfere ona ba Ospitál Nasionál Guido Valadares (HNGV, sigla portugés) hafoin tratamentu dahuluk iha Ospitál Rejionál Eduardo Ximenes,” Segundu Komandante PNTL hateten iha Vila Nova, segunda ne’e.
Hafoin baku, vítima hato’o informasaun ho intensaun hakarak atu prevene nune’e hamutuk ho xefe aldeia inisiál DFS koko halo konfirmasaun maibé suspeitu sira kontinua halo asaun hasoru xefe aldeia hodi rezulta kanek grave no motorizada hetan sunu iha fatin akontesimentu.
Hafoin simu informasaun, PNTL liuhosi seksaun investigasaun hala’o kedas serbisu hanesan identifikasaun ba suspeitu na’in-hitu no hosi akontesimentu ba asaun konfruntu ne’e rezulta vítima hamutuk na’in-haat no uma komunidade balun hetan estragu.
“Kazu ne’e kompleta ona investigasaun, aban ita haruka ona ba Ministériu Públiku,” Superintendente asistente José Casemiro akresenta.
Vítima nain-haat ne’e ho inisiál FJ, DBS, ES no DSF nune’e kazu refere hamosu krime tolu hanesan danu agravadu ne’ebé prevista iha kódigu penál artigu 259, ofensa integridade fizika simples artigu 143 no lei númeru 5/017 kona-ba arma branka.
Enkuantu suspeitu na’in-hitu ne’e deskonfia hosi membru organizasaun arté hanesan insiál RRC, ARF, CDCS, FV, JBC, ZDS no M ne’ebé maioria estudante ho purvolta idade 16 to’o 20.
Jornalista : Natalino Belo
Editór : Evaristo Soares Martins
