Eleitór rihun-rua resin hosi Buruma sei vota iha eleisaun suku
BAUCAU, 26 setembru 2023 (TATOLI) – Eleitór hamutuk rihun-rua resin hosi suku Buruma, postu administrativu Baucau Vila sei ezerse direitu votu iha eleisaun suku iha fulan-outubru tinan-ne’e.
Administradór postu administrativu Baucau vila, Isencinio António da Silva, haktuir, hosi totál eleitór refere sei estabelese sentru votasuan tolu kompostu iha aldeia Casmutu, Ono-sere no Tasi nune’e bele fasilita hakbesik fatin votasaun ba komunidade.
“Ita hakarak komunidade komprende nune’e bele deside liuhosi kandidata aan no hili lideransa iha suku,” Administradór postu Baucau vila informa TATOLI iha Vila Antiga, tersa ne’e.
Isencinio da Silva, argumenta, parte postu administrativu hamutuk ho autoridade munisipál inklui STAE kontinua serbisu makaas hodi fó susesu ba eleisaun suku hanesan sosializa baze legál sira inklui mekanismu eleisaun suku ba komunidade iha kada suku.
Matéria ne’ebé sosializa mak hanesan dekretu-lei númeru 9/2026 kona-ba xefe suku hanesan kompeténsia xefi suku, aldeia no membru konsellu suku sira, dekretu governu númeru 23/2016 no regulamentu governu númeru 14/2016.
Alende ne’e, fahe informasaun kona-ba mekanismu eleisaun hanesan rekizitu administrasaun liuliu prosesu rejistrasaun ba kandidatura xefe suku, aldeia no membru konsellu suku liuliu ba postu administrativu Baucau tanba kategoria nu’udar suku barak iha Baucau.
“Ita fó prioridade mos ba feto malu sira, bainhira kaundu la disponivel presiza reprezenta atu halo deklarasaun,” Isencinio da Silva akresenta.
Suku Buruma hamutuk aldeia haat komposta hosi Tasi, Casamuto, Ono-sere no Suliua ho totál populasaun 3.639.
Jornalista : Natalino Belo
Editór : Evaristo Soares Martins
