DILI, 27 setembru 2023 (TATOLI) – Ministra Edukasaun, Dulce de Jesus, aprova ona lista naran profesór hamutuk 1.275 hodi partisipa kursu baxarelatu iha Universidade Nasionál Timor Lorosa’e (UNTL) no semana oin sira sei halo inskrisaun.
Manorin sira ne’e sei tuir kursu durante tinan tolu nia laran hodi bele responde ba rekizitu Ministériu Edukasaun nian ne’ebé define ona katak profesór ne’ebé maka hanorin iha eskola mínimu tenke iha grau akadémiku baxarelatu.
Prezidente Institutu Nasionál Formasaun Dosente no Profisionál Edukasaun (INFORDEPE, sigla portugés), Domingos Martins, hatete formasaun ba profesór sira ne’e ba tinan akadémiku 2023 to’o 2026 no iha semana oin sira halo ona inskrisaun ba semestre dahuluk nian.
“Tentativa iha prósima semana ne’e ita sei halo abertura aula iha Dili depois sira husi munisípiu bele partisipa de’it ona aula iha ida-idak ninia fatin”, Domingos informa ba Tatoli iha Balide, ohin.
Profesór pemanente no sira ne’ebé mak partisipa ona kursu komplementár mak tuir formasaun akadémika ne’e. “Kursu komplementár ne’e ita sei haree liu ba profesór sira ne’ebé maka ho idade produtiva menus husi 50. Bainhira sira remata formasaun bele kontribui ba ministériu hodi garante dezenvolvimentu edukasaun molok tama idade reforma”, dehan.
Dekanu Fakuldade Edukasaun, Arte no Umanidade, Teodoro Soares, antes ne’e hatete katak kooperasaun ne’ebé INFORDEPE no UNTL halo iha ámbitu formasaun baxarelatu aseleradu ne’e sei hala’o ba manorin sira tuir kada munisípiu, tanba sira nu’udar profesór ein karreira no labele husik hela sira-nia responsabilidade ba alunu sira.
“Formasaun ba profesór na’in-1.275 ne’e, ita sei konsentra iha kada munisípiu tanba sira ne’e nu’udar profesór ein karreira, labele mai tuir aula iha UNTL. Entaun, ita mak bá de’it hodi fó formasaun ba sira iha ida-idak nia munisípiu”, realsa.
Ministériu prevee $499.228 iha transferénsia públika hodi realiza formasaun akadémika ba manorin sira.
Notísia relevante: Profesór 1.275 sei partisipa kursu baxarelatu iha UNTL
Jornalista: Tomé Amado
Editora: Maria Auxiliadora
