Ezekusaun merenda eskolár Baucau iha faze finalizasaun
BAUCAU, 28 setembru 2023 (TATOLI) – Prosesu implementasaun programa merenda eskolár iha Baucau tama ona faze finalizasaun no tuir planu sei remata iha fulan-novembru tinan-ne’e.
Diretór Serbisu Munisipál Edukasaun Baucau, Augosto Ornai Ximenes, esplika, prosesu ezekusaun orsamentu ba programa refere to’o ona pursentu 90 ne’ebé fo impaktu pozitivu ba ezekusaun orsamentu tinan fiskál 2023 nian iha autoridade administrasaun munisipál.
“Agora ita ezekuta ba faze ikus, programa ne’e hela hela loron 42 efetiva no agora fulan-ne’e ikus ba trimestrál datoluk nian,” Diretór Serbisu Munisipál Edukasuan hateten iha Vila Nova, kinta ne’e.
Ezekusaun ba orsamentu merenda eskolár hala’o transferénsia dala-ida no kada loron ezekuta ho valor rihun $80 resin bazea ba númeru benefisiáriu nune’e halo taxa ezekusaun iha edukasaun Baucau to’o pursentu 90.
Programa merenda eskolár faze pedidu levantamentu orsamentu hosi Ekipa Jestaun-Programa Merenda Ekolár (EJP) ne’ebé tuir planu sei implementa iha loron-2 fulan-outubru to’o 24 novembru tinan-ne’e.
EJP sei kontinua halo relatóriu ezekusaun faze dahuluk to’o daneen nian tuir matadalan programa merenda eskolár hosi fulan-marsu to’o setembru nian.
“Ezekusaun sei lato’o pursentu 100 tanba prosesu implementasaun hahú tarde, ita ezekuta hahú iha fulan-marsu,” Augosto Ximenes akresenta.
Tuir alokasaun orsamentu tinan-2023, programa merenda eskolár iha Baucau hamutuk loron-164 maibé tanba programa refere implementa tarde iha fulan-maiu nune’e orsamentu ba fulan-janeiru no fevereiru sei fila ba kofre estadu.
Nune’e, programa merenda eskolár iha munisípiu Baucau implementa ho totál orsamentu hamutuk millaun $2.4, durasaun loron-140 ho totál benefisiáriu hamutuk rihun 32 resin.
Edukasaun Baucau implementa EJP merenda eskolár hamutuk 35 hosi totál dapur hamutuk 181 hosi ensinu pre-eskolár hamutuk 35 no ensinu bázíku hamutuk 177.
Jornalista : Natalino Belo
Editór : Evaristo Saores Martins
