Agostu: HNGV trata pasiente kankru 123
DILI, 29 setembru 2023 (TATOLI) – Médiku espesialista onkolojia iha Hospitál Nasionál Guido Valadares (HNGV), João Teodosio, hateten durante fulan agostu, pasiente ne’ebé halo tratamentu ba moras kankru iha ospitál hamutuk 123.
“Iha fulan agostu nia laran, ami-nia atendimentu ba pasiente sira ho moras kankru hamutuk 123, husi númeru ne’e, sura ho ami-nia atendimentu OPD ne’ebé mak ami halo semana ida dala tolu to’o dala haat, entaun ida-ne’e ami-nia konsulta rutina sira ne’ebe durante ne’e iha”, João Teodosio, informa iha nia servisu fatin HNGV, ohin.
Nia esplika, husi totál ne’e pasiente balun mai konsulta baibain no balun halo segimentu ka follow up, pasiente balun foin primeira-vez mai iha ne’e.
Husi fulan agostu ne’e, iha pasiente na’in-haat mak halo tratamentu iha rai liur no sira fila fali mai halo tratamentu iha ne’e.
“Iha pasiente kankru susun na’in haat mak halo hela tratamentu kontinuasaun iha ne’e tanba durante ne’e sira halo tratamentu iha rai liur iha faze intensivu no remata sira-nia tratamentu no fila fali mai ami halo iha ne’e”, nia informa.
Nia haktuir, fatór risku ida-ne’e bele sai hanesan fatór ida ne’ebé bele prodús moras kankru hanesan mai husi família, fatór jenétiku ka fatór sira seluk hanesan pasiente sira fuma, hemu tua, konsumu hahan ne’ebé mak la saudavel, entaun ida-ne’e sira bele sofre moras kankru ida-ne’e.
“Kankru ne’e nia kauza prinsipál ba moras ida-ne’e ita seidauk deskobre maibé fatór risku ida ne’e bele sai hanesan fatór ida ne’ebé bele prodús moras kankru, ita koalia fatór sira ne’e mai husi família hanesan fatór jenétiku ka fatór sira seluk hanesan pasiente sira fuma no hemu tua, konsumu hahan ne’ebé mak la saudavél, entaun bele sofre moras kankru ida-ne’e”, nia subliña.
Nia hateten, kona-ba tratamentu moras ne’e médiku sira sei lori ba ekipa junta médika hodi haree pasiente nia kondisaun atu bele halo transferénsia ba rai liur hodi halo tratamentu saúde.
Nia afirma, bainhira tratamentu hotu ona iha sentru sira ne’ebé mak iha transferesia ba hanesan Indonézia, Singapura, Malazia halo komunikasaun ho doutór sira ne’ebé halo atendimentu ba pasiente moras kankru depois haree posilibidade hano tratamentu balun iha timor mak haruka fila fali mai halo tratamntu iha ne’e.
“Ezemplu agora daudaun, ami iha pasiente na’in-haat, durante ne’e halo tratamentu iha rai liur, entaun ida-ne’e mak ami halo atendimentu kontinuasaun”, nia informa.
Nia akresenta, atu prevene ba moras kankru ne’e mak evita fuma, hemu no konsumu hahan ne’ebé mak saudavél.
Jornalista : Felicidade Ximenes
Editór : Zezito Silva
