INFORDEPE fasilita formasaun lideransa ba kargu xefia sira iha Oé-Cusse
OÉ-CUSSE 02 outubru 2023 (TATOLI – Institutu Nasionál Formasaun Dosente Profisonál Edukasaun (INFORDEPE) fasilita formasaun ba lideránsa faze dahuluk ba kargu xefia iha Eskola Ensinu Báziku sira hahú hosi ensinu Pré-Eskolár, ensinu báziku primeiru to’o terseiru siklu inklui inspetór eskolár sira iha Rejiaun Administrativa Espesiál Oé-Cusse Ambeno (AMBENO).
Notísia relevante: Realizasaun kursu baxeralatu ba profesór rihun-resin sei hein verifikasaun dadus
Vise-Prezidente INFORDEPE ba Asuntu Peskiza Dezenvolvimentu Monitorizasaun no Avaliasaun, Sebastião de Oliveira, hateten, formasaun ne’e fasilita hosi formasaun ida-ne’e fornese hosi parseria Best, liuhosi kooperasaun Ministériu Edukasaun servisu hamutuk ho INFORDEPE hodi formasaun ne’e realiza durante loron rua, hahú Segunda ne’e to’o tersa, 02-04 outubru.
Matéria prinsipál ne’ebé aplika iha formasaun ne’e, fokuliu kona-bá iha área lideransa nian, tanba formandu sira partisipa iha formasaun ne’e alvu ba kargu xefia sira mai hosi eskola hotu-hotu iha territóriu Oé-Cusse.
Nia informa, formasaun ne’e alvu ba sira-ne’ebé okupa hela kargu xefia hanesan, diretór eskola, Adjuntu, koordenadór filiál sira, nune’e oinsa bele iha abilidade ne’ebé mak natoon, atu jere eskola ida.
“Atu eskola ne’e sai di’ak no kualidade ninia jestaun sira di’ak, entaun ita presiza dirijente ida-ne’ebé maka iha abilidade natoon depois bele jere eskola rasik, atu garante mós kualidade edukasaun no garante transmisaun siénsia ne’ebé ho di’ak ba estudante sira,” nia ko’alia iha ámbitu abertura formasaun ne’e, iha salaun edukasaun Oé-Cusse.
Nia hatutan, bainhira formasaun ne’e remeta sei fasilita mós formasaun ba profesór sira, atu profesór ida oinsá hatudu ninia lideransa ida, atubele jere jestaun tomak iha klase ida nia laran.
Diretór Edukasaun Oé-Cusse, Daniel Mauno, agradese ba Ministériu Edukasaun no Juventude Despostu tanba bele fasilita formasaun no kapasitasaun ba responsável eskola sira iha Rejiaun Oé-Cusse Ambeno.
“Ohin to’o aban, ita atu haree took, ita-nia kna’ar ne’e saida, tanba dalaruma mós akontese iha fatin servisu, tenki hot-hotu kontrola ita-nia kna’ar, tanba ne’e maka formasaun ba lideránsa importante bai ta nu’udar dirijente iha estrutura eskola sira, ne’e foin mak ensinu báziku, tan ne’e ita agradese ba Ministériu tanba fasilita ita atu hatene ita-nia kompeténsia ne’e durante ne’e la’o oinsa ba futuru karik ita bele hadi’a ho objetivu atu kontribui mellora kualidade edukasuan iha ita-nia rai,” nia orgullu.
Notísia relevante: Realidade iha EBF Kamlai: Profesora ida ba alunu 89
Jornalista: Abílio Elo Nini
Editór: Evaristo Soares Martins
