Top

Komandu PNTL dezloka ona membru-34 haforsa seguransa fronteirisa

Komandante Jerál PNTL, Komisáriu Jerál Henrique da Costa. Imajen Tatoli/Francisco Sony

DILI, 02 outubru 2023 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa, hateten Komandu PNTL dezloka ona membru-nain 34 hodi apoia Unidade Patrollamentu Fronteira (UPF) atu fó seguransa iha liña fronteira terestre entre Timor-Leste ho Indonézia.

“Ohin ita dezloka ona ita-nia membru PNTL na’in-34 ne’ebé mak antes ne’e ita planeia ona no sira ne’e ita sei destaka iha fronteira hodi tulun membru UPF sira atu fó seguransa iha liña fronteira”, Henrique da Costa, hateten ba jornalista hafoin remata prezide serimónia dezlokasaun  membru PNTL na’in-34 hodi reforsa UPF iha liña fronteira terrestre entre Timor-Leste ho Indonézia, segunda ne’e.

Nia dehan, membru na’in-34 ne’ebé mak Komandu PNTL destaka iha fronteira hodi apoia UPF sira atu asegura iha liña fronteira kompostu hosi kada membru Komandu PNTL munisípiu sira iha membru na’in-rua inklui membru balun hosi Unidade Espesiál Polísia (UEP).

Nia esplika, razaun Komandu koloka tán membru na’in-34 hodi haforsa membru UPF hodi fó seguransa ba seguransa fronteira tanba bazea ba relatóriu hosi Komandu UPF iha fulan hirak ba kotuk ne’e sasán kontra bandu barak mak tama no sai iha liña fronteira .

Tanba ne’e, iha difikuldade maibé Komandu Jerál PNTL relata ba Ministru Interiór kona-ba difikuldade sira-ne’e, nune’e MI aseita nesasariamente destaka tán membru balun atu apoiu seguransa iha fronteira.

“Membru PNTL hamutuk 34 ne’ebé mak ohin dezloka ba fronteira, sira sei halo funsaun durante fulan rua, kuandu kompleta fulan rua entaun sei troka fali membru sira seluk”, Komisáriu Jerál Polísia Henrique informa.

Henrique sei halo jestaun ba transporte sira ne’ebé iha, Komandu Jerál atu apoiu UPF bele halo servisu kontrolu iha liña fronteira ho di’ak liután.

Nia husu mós ba Komandu PNTL atu tau atensaun ba membru polísia sira ne’ebé daudaun ne’e atu ba reforsa seguransa iha fronteira atu uza arma ho kuidadu.

“Membru Polísia sira-ne’e presiza halo komunikasaun mak barak maibé iha situasaun balun mak fó ameasa ba sira-nia vida no ema seluk nia vida, ita la iha razaun atu halo tán negosiasaun, bainhira iha komunikasaun la hetan ona solusaun última rekursu tenke uza armas”, nia adianta.

“Aktus ne’e sei la akontese, tanba kuandu akontese ne’e mak kilat tarutu iha fronteira, halo ema pániku fali”, nia konklui.

Notísia relevante : Komandu PNTL sei destaka tán membru 39 apoia UPF iha fronteira

UPF halo apreensaun ba mina-rai no sigarru ilísitu

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!