MS rejista 15 inan isin-rua pozitivu ba HIV-SIDA
DILI, 02 outubru 2023 (TATOLI) – Xefe Programa ba Moras Hadaet husi Relasaun Seksuál iha MS, Bernardino da Cruz, dehan Ministériu Saúde, husi janeiru to’o juñu, rejista inan isin-rua sira ne’ebé mak hetan pozitivu ba HIV-SIDA hamutuk 15.
“Husi janeiru to’o juñu, ita identifika inan isin-rua sira ne’ebé mak hetan pozitivu ba HIV-SIDA hamutuk 15. Husi númeru ne’e, sira iha tratamentu nia-laran”, Bernardino da Cruz ba TATOLI iha nia kna’ar fatin Lahane, ohin.
Husi inan-isin rua 15, iha mós vitima seropozitivu hamutuk 184 iha territóriu Timor-Leste.
Nia dehan, inan-sira ne’e, profisionál saúde deteta iha fasilidade saúde sira iha teritórriu nasionál, tanba Ministériu Saúde durante ne’e habelar informasaun hotu kona-ba tratameentu moras HIV-SIDA to’o postu saúde sira.
“Ami-nia planu ba oin, ita tenke entrega ita-nia servisu ba saúde na família, hodi fahe informasaun kona-ba moras HIV-SIDA ba populasaun liuhosi tama sai uma”, nia afirma.
Nia haktuir, servisu ida-ne’e ba oin tenke di’ak liután hodi garante populasaun sira-nia moris klaru katak populasaun sira hasoru ona moras ne ’e presiza ba fasilidade saúde ne’ebé mak di’ak no ekipamentu ne’ebé ho kualidade.
“Ita-nia planu kona-ba servisu ida-ne’e, mós tenke di’ak, hodi garante servisu ne’ebé di’ak ba ita-nia populasaun sira, klaru ita hanoin iha buat rua katak oinsá populasaun komprende no fasilidade saúde mós tenke kompletu no kualidade”, nia konklui.
Ministériu Saúde liuhosi Departamentu Moras Hadaet rejista pasiente sira ne’ebé afeta ho moras HIV-SIDA husi tinan 2003-2023 hamutuk 1.034.
Notísia relevante : TL rejista atualmente afetadu HIV-SIDA hamutuk 1849
Jornalista : Felicidade Ximenes
Editór : Zezito Silva
