Pesoál apoia suku nai’n-59 sei destaka ba suku iha Baucau

BAUCAU, 03 outubru 2023 (TATOLI) – Pesoál Sekretariadu Tékniku Administrasaun Eleitorál (STAE) apoia suku hamutuk na’in-59 sei destaka ba suku hodi hala’o preparasaun hasoru eleisaun suku iha Baucau.  

Diretór STAE Baucau, Natividade Freitas, esplika, jestór STAE Baucau hala’o ona formasaun iha nasionál nune’e kontinua fó matéria ba pesóal apoia suku sira-ne’ebé tuir planu sei sai apoia tékniku bainhira iha loron rejistrasaun to’o eleisaun remata.

“Ita sei fó formasaun ba sira durante loron-tolu antes sira sei kontinua ba kada suku,” Diretór STAE Baucau hateten iha Vila Nova, tersa ne’e.

Pesoál apoia suku hirak refere nakfilak formadór bainhira destaka ba suku sira hanesan fó formasaun ba membru konsellu suku na’in-tolu no membru pesoál apoia aldeia sira kona-ba prosesu tomak lala’ok eleisaun suku nian.

Nune’e, pesoal apoia suku hirak-ne’e tenke hatene kona-ba matéria atu simu dokumentu kandidatura xefe suku, verifika, deside apoiante pursentu ida kada kandidatura hosi totál eleitór iha suku, prezide meza eleisaun suku no koñesementu jerál kona-ba prosesu eleisaun suku.

“Sira sei fó formasaun tutan ba membru meza eleisaun iha kada suku,” Natividade Freitas akresenta.

Pesoál apoia suku na’in-59 hetan kontratu durante fulan-tolu hosi fulan-setembru to’o novembru no STAE rekruta mós pesoál apoia aldeia hamutuk 281 ne’ebé tuir kontratu sei efetivu serbisu iha loron eleisaun.

Eleisaun suku sei akontese iha loron-28 outubru no iha munisípiu Baucau tuir planu sei realiza iha suku hamutuk 59 hosi totál postu administrativu neen hanesan Baucau vila, Baguia, Laga, Quelicai, Venilale no Vemasse

Jornalista    : Natalino Belo

Editór           : Evaristo Soares Martins