Estudante 280 sei tuir ezame nasionál iha ESJ II Baucau
BAUCAU, 05 outubru 2023 (TATOLI) – Estudante hamutuk na’in-280 hosi Eskola Sekundária Jerál (ESJ) númeru II Baucau sei tuir ezame nasionál no lokál iha fulan-outubru ne’e.
Xefe Gabinte Apoia Tékniku Eskola Sekundária Jerál númeru II Baucau, Manuel Sarmento, esplika, prosesu preparasaun ba ezame nasionál no lokál iha eskola refere atinje ona pursentu 90 hanesan matéria ezame, dadus no númeru ezame.
“Falta pursentu 10 hanesan limpeza eskola, aula ezame no simu kartaun ezame inklui oráriu ezame nasionál no lokál,” Nia informa ba Agência TATOLI iha Vila Nova, kinta ne’e.
Hosi númeru estudante refere komposta hosi mane na’in-85 no feto na’in-143 ho totál aula ezame 12 kompostu hosi siénsia teknolojia aula neen no siénsia umanidade neen.
Parte eskola elabora ona matéria ezame lokál, enkuantu matéria ezame nasionál sei hein distribusaun hosi nasionál ba edukasaun munisípiu antes to’o iha sentru realizadór sira inklu ESJ II Baucau.
“Matéria ezame nasionál profesór sira hanorin hotu ona inklui matrix hosi kedas primeiru anu to’o terseiru, ami preparadu atu hasoru ezame,” Manuel Sarmento akresenta.
ESJ II garante ezame nasionál no lokál sei susesu tanba parte Ministériu Edukasaun liuhosi edukasaun munisípiu kolabora ona ho autoridade seguransa hodi fó susesu ba ezame refere.
Matéria iha ezame nasionál hamutuk hitu komposta hosi matéria jerál língua Tétún, Inglés no Portugés, espesifíku siénsia, teknolojia, matemátika, fízika, biolojia no kímiku, enkuantu ba siénsia sosiál umanidade komposta hosi jeografia, sosiolojia, istória no ekonomia.
Materiá ezame lokál kompostu desportu, relijiaun, teknolojia multimedia, literatura no geolojia.
Tuir kalendáriu edukasaun, ezame nasionál sei realiza durante loron tolu, hahú iha 16 to’o 19 fulan outubru no ezame lokal sei realiza iha loron-20 to’o 23 fulan-outubru.
Jornalista : Natalino Belo
Editór : Evaristo Soares Martins
