INTL arrekada reseita rihun $150 ba kofre Estadu
DILI, 05 outubru 2023 (TATOLI) – Hahú hosi fulan Janeiru to’o Setembru 2023, Imprensa Nasionál Timor-Leste, Institutu Públiku (INTL,I.P) konsege arrekada reseita rihun $150 ba kofre Estadu.
Reseita hirak ne’e, INTL rekolla liuhosi atividade imprensaun ba livru lejizlasaun sira, bulletin votu, pafletu ba publisidade no seluk tan ne’ebé mai hosi instituisaun Estadu, ajénsia nasionál no internasionál inklui hosi Universidade sira.
“Pagamentu ba impresaun sira ne’e selu diretamente ba banku. Ami haruka de’it fatura ho konta bankária ba kliente sira atu ba selu direita iha banku no tama ba kofre Estadu”, relata Prezidente Konsellu Diretivu ba Imprensa Nasionál Timor-Leste, Institu.Públiku, Jaime Mártires Correia, ba Agéncia TATOLI, iha Colmera-Dili.
Nia hateten presu ba impresaun depende ba iha nesesidada klientes sira tanba kualidade papél no tamanu livru sira ne’e la hanesan.
“Ami fó prioridade atu imprime lejizlasaun ne’ebé vigór iha Timor-Leste. Nune’e ami halo imprime barak liu mak mai Ministériu Interiór konaba kartu pasajen iha fronteira. Kada fulan rua sira haruka ami imprime ezemplar 30.000. Nune’e mós pedidu Institutu Politécnico Betano hodi prodúz sertifikadu ba estudante sira ne’ebé remata sira nia estudu”, katak
Daudaun ne’e, Universitáriu sira mós ba sosa diretamente livru sira hanesan Kódigu Penál Timor-Leste, Kódigu Prosesu Penál no Kódigu Sívil ho nia prosesu.
Laiha tékniku ba reparasaun mákina
Prezidente INTL ne’e afirma, presiza rekursu umanu kapasitadu iha área téknika oinsá bele kontrola no halo manutensaun ba mákina imprime sira bainhira avaria.
“Ita laiha tékniku profisionál atu hadi’a bainhira mákina avaria. Ita nia mákina sira mesak foun hotu de’it no ita nia operadór sira seidauk iha kbi’it atu halo manutensaun ba mákina sira”, nia preokupa.
Daudaun ne’e, nia dehan tékniku estranjeiru sira mak halo manutensaun, maibé selu ho kustu boot.
“Ami bolu tékniku sira estranjeiru mai, maske akompanã de’it no la servisu, maibé ita selu nafatin tanba tauk mak derepente mákina avaria bainhira halo imprisaun ruma”, nia afirma. avaria derepente tenki atende, tamba Governo foi tempu ne’ebé determinadu atu entrega”, dehan nia.
Ho situasaun ne’e, nia afirma prevee osan iha 2024 atu prepara rekusu umanu liuliu tékniku na’it haat ida atubele halo reparasaun ba mákina sira ne’e.
Jornalista: Jesuiína Xavier
Editor : Florencio Miranda Ximenes
