INTERNASIONÁL, DILI, HEADLINE

Xefe Estadu partisipa simeira Building Bridges iha Jeneva

Xefe Estadu partisipa simeira Building Bridges iha Jeneva

Imajen : Prezidénsia Repúblika

DILI, 05 outubru 2023 (TATOLI) – Prezidente Repúblika José Ramos Horta partisipa iha simeira Building Bridges hodi ko’alia kona-ba dezenvolvimentu sustentavél ne’ebé hala’o iha Sentru Internasionál Konferénsia Genese (CICG-sigla inglés).

“Reuniaun entre lideransa emprezariál sira, ofisiál Governu no reprezentante sosiedade sivíl sira atu buka dalan hodi harii ponte entre setór oioin no promove dezenvolvimentu sustentável”, hatete iha komunikadu ne’ebé Agência TATOLI asesu hosi media Gabinete Prezidensia Repúblika (GPR), kinta ne’e.

Iha simeira internasionál ne’e, Ramos Horta toka mós kona-ba importánsia atu harii ponte entre nasaun no kultura oioin no nia ko’alia liu kona-ba nesesidade atu halo kooperasaun hodi responde ba dezafiu globál sira hanesan mudansa klimátika no kiak.

Iha sesaun diskusaun, Diretor-Jerál Organizasaun Mundiál Komérsiu (OMK) Ngozi Okonjo-Iweala hato’o deklarasaun importante ida kona-ba importánsia komérsiu ba dezenvolvimentu sustentável.

Sorumutu ne’e mós hatudu diskusaun balun seluk ne’ebé lidera hosi ezekutivu setór privadu sira.

Diskusaun sira-ne’e foka liubá tópiku oioin, inklui finansiamentu klimátiku, agrikultura sustentável no transformasaun dijitál.

Aleinde ne’e, iha mós sorumutu kona-ba planeamentu sira sai hanesan plataforma importante ida atu diskute dalan sira atu harii mundu ida-ne’ebé sustentável no ekuitativu liu.

Prezidente Ramos-Horta nia partisipasaun iha sorumutu ne’e sai nu’udar testemuña ida ba nia kompromisu ba kooperasaun internasionál no fiar ba ‘ponte’ sira-nia kbiit atu halibur ema no kultura sira.

Iha ámbitu Konferénsia ‘Building Bridges’ iha diskursu, Prezidente Ramos Horta ko’alia mós nesesidade urjente ba instituisaun finanseiru globál, Governu no entidade setór privadu atu kolabora hodi hadi’a dezafiu boot liu iha mundu.

“Impaktu devastadór hosi COVID-19 no funu iha Ukránia ba nível pobreza globál no estabilidade ekonomia”, tenik Xefe Estadu iha nia diskursu.

Xefe Estadu enfatiza importánsia atu foka ba investimentu ne’ebé sentra ba umanidade no ema hodi kombate dezafiu sira ne’e.

Nia propoin versaun modernizadu hosi ‘Planu Marshall’, konvida banku sira, fundasaun sira, universidade sira, grupu igreja no família riku sira hosi mundu tomak atu kontribui ba kauza ida-ne’e.

Prezidente Ramos Horta sujere katak Suisa ho nia istória naruk kona-ba neutralidade no kooperasaun globál, bele lidera inisiativa ida-ne’e.

Nia husu komunidade globál atu kontinua foka no hili ho kuidadu saida mak importante liu hodi atinje progresu signifikante.

Diskursu ida-ne’e serve hanesan apelu ba asaun ba parte interesadu (stakeholder) hothotu atu servisu hamutuk hodi hetan futuru ne’ebé sustentável liu no justu.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!