Amilcar husu MOP hadi’ak estrada Batugade-Balibo
MALIANA, 06 outubru 2023 (TATOLI)-Administradór postu administrativu Balibó, munisípiu Bobonaro, Amilcar Tavares, husu Ministériu Obra Públika (MOP) atu hadi’ak estrada nasionál ligasaun hosi Batugade ba Balibó vila tanba kondisaun kuaze grave.
Amilcar Tavares imforma asuntu ne’e ba Sekretáriu Estadu Dezenvolvimentu Lokál, Mateus dos Santos Tallo, iha salaun administrasaun munisípál Bobonaro, sesta ne’e.
Enkuantu estrada ne’e hahú hosi kapitál Dili to’o rotunda Batugade, no hosi Balibó Vila ba Maliana, governu anteriór konstrui ona, maibé sei falta diresaun Batugade ba Balibó Vila mak to’o ohin loron sei uza obra ne’ebé governu Indonézia husik hela.
Notísia Relevante:MOP submete pedidu asesu fundu impréstimu reabilita estrada Batugade-Balibo
Tuir Amilcar katak, governu foun presiza tau prioridade tanba estrada lokaliza kedas iha liña fronteira entre Timor-Leste ho Indonézia ne’ebé sai hanesan imajen Repúblika Demokrátika Timor-Leste.
“Estrada ida hosi Batugade sae mai ne’e tau-matan netik lalais oituan ba, atu interkámbiu, entre Timor ho Indonézia ne’e, ema mai karik imajen ne’e di’ak oituan ba,” nia fó hanoin.
Hatan preokupasaun ne’e, Sekretáriu Estadu Dezenvolvimentu Lokál, Mateus dos Santos Tallo, promete sei hato’o ba Ministru Obra Públika, Samuel Marcal.
“Asuntu ida ne’e urjente, depois ami koordena took iha nível polítiku, ho mós sira IGE,” nia katak.
Tuir dadus monografia 2021 postu administrativu Balibo iha aldeia 27, suku neen mak hanesan Sanirin, Cowa, Leo-lima, Leo-hitu, Balibo Vila no Batugade ho totál populasaun 19,869 no totál uma-kain 4,708.
Notísia relevante: MOP sei halo manutensaun estrada Batugade-Balibo to’o Maliana
Jornalista: Sérgio da Cruz
Editór: Evaristo Soares Martins
