Eskola tolu iha Liquiçá seidauk hetan akreditasaun
DILI, 06 outubru 2023 (TATOLI) – Servisu Edukasaun Munisípiu Liquiçá rejista eskola bázika tolu seidauk hetan akreditasaun husi Ministériu Edukasaun, tanba ne’e Gabinete Avaliasaun no Dezenvolvimentu Kurrikulár verifika hela dokumentu ne’ebe eskola submete.
Tanba estatutu eskola sira ne’e seidauk loos mak alunu hamutuk 123 to’o agora sei uza hela kaderneta provizória.
Diretór Servisu Edukasaun Liquiçá, Carlos Lopes, informa katak eskola tolu ne’e mk São Francisco de Assis (iha alunu 45), Eskola Padre Artur (40) no eskola bázika komunidade nian ne’ebé harii iha área Maubara (38).
Tuir dirijente ne’e, estatutu eskola sira ne’e sei fó sai iha tinan oin no desizaun sira ne’e depende ba prosesu avaliasaun husi Gabinete avaliasaun nian.
“Sira-nian dokumentu hotu ita submete ona ba Ministériu Edukasaun. Daudaun ne’e iha prosesu verifikasaun husi Gabinete Avaliasaun no hetan mós ona observasaun iha terrenu. Fiar katak tinan oin bele hetan ona akreditasaun”, nia espera.
Jornalista: Tomé Amado
Editora: Maria Auxiliadora
