Bobonaro selebra loron mundiál saúde mentál

BOBONARO, 10 outubru 2023 (TATOLI) – Sentru Saúde Mentál São Bento Menni, ne’ebé lokaliza iha bariru Pemancar, suku Lahomea, postu administrativu Maliana, munisípiu Bobonaro, tersa ne’e hamutuk ho servisu saúde munisipál Bobonaro no família sira selebra loron mundiál saúde mentál ne’ebé kada tinan selebra iha loron 10 fulan-outubru.

Loron mundiál saúde mentál 2023 ho tema “Mental Health is a Universal Human Right” ka “Saúde Mentál Nu’udar Direitu Umanu Universál.”

Hanesan hakerek ona iha portal World Federation of Mental Health (WFMH), tema ida-ne’e iha korelasaun ho WFMH nia prinsípiu hahú iha 1948 liubá ne’e. Kampaña komemorasaun ba loron loron mundiál saúde mentál iha 2023 ne’e, hakarak halo saúde mentál sai hanesan direitu umanu ida.

Ho nune’e, aspirasaun hasoru saúde mentál ne’ebé saudável ne’e presiza hanesan direitu bázika ne’ebé fó ba ema kada ema ida iha ninia moris tomak, atu sai hanesan parte ida hodi atinje no kuidadu saúde mentál ema hotu-hotu iha mundu.

Diretór sentru Saúde Mentál São Bento Menni, Irmá Andrea Calvo, hateten iha selebrasaun loron mundiál ne’e, hala’o atividade jogu, fahe prezente, hananu, no dansa ho múzika hodi anima  defisiénsia mentál sira.

“Ohin loron boot ba saúde mentál nian, ita mai halibur hamutuk iha-ne’e,a tu haksolok, kontente hamutuk, ami agardese ba imi-nia prezensa, no mós família sira-ne’ebé akompaña imi mai iha festa ida-ne’e,” Diretór Sentru Saúde Mentál São Bento Menni, Irmá Andrea Calvo, hateten, iha bairru Pemancar, Lahomea.

Reprezentante Diretór Servisu Munisipál Saúde, Munisípiu Bobonaro, Paulina de Assunção Deneire, parabeniza sidadaun defisiénsia mentál sira iha munisípiu Bobonaro laran tomak.

Nia dehan, selebrasaun loron mundiál ne’ebé realiza mós atividade oinoin ne’e ho objetivu atu hakmaan sofrementu ne’ebé defisiénsia mentál sira sente.

“Ita mai kontente, hasai memória sira-ne’ebé ladi’ak atubele hanoin nakloke ba buat-ne’ebé di’ak, atu ita-boot sira kontente, entaun bele di’ak lalais,” nia dehan.

Nia agardese ba madre sira iha sentru saúde São Bento Menni ne’ebé durante  hala’o tratamentu psikolojía, akonsellamentu ho maneira sira-ne’ebé iha no vizita domisialiária ba defisiénsia mentál iha idak-idak nia rezidénsia.

Maibé nia hatutan, servisu saúde munisipál Bobonaro mós kontinua apoia ai-moruk no medikamentu ba sentru saúde mentál ne’e.

“Atu nune’e ita-boot sira bele hanoin ne’e hakmatek atubele sai fali ema-ne’ebé normal,” Paulina afirma.

Fatin ne’e sei sai mós oportunidade kona-bá importánsia kuidadu moras mentál ho forma atu promove integrasaun sosiál, nomeadamente sei ajuda mós ema hotu-hotu iha família no sosiedade.

Sentru saúde mentál ne’e mós regularmente sei realiza konsulta externa ba postu saúde lima iha munisípiu Bobonaro hanesan Cailaco, Bobonaro, Atabae, Balibo no Maliana. Madre sira mós fó formasaun ba pesoál saúde no família.

Enkuantu durante fulan rua ema ho defisiénsia mentál na’in-34, mak halo hela tratamentu iha klínika ne’e inklui família.

Istória loron mundiál saúde mentál

Loron mundiál saúde mentál komemora iha loron 10 outubru.  Istória komemorasaun ne’e hahú iha tinan 1992, iha tempu ne’eba RICHARD HUNTER hanesan Vise Sekretáriu Jerál World Federation of Mental Health (WFMH) mak funda.

Iha komemorasaun ba dahuluk ne’e, 10 outubru 1992, ne’e hahú la ho tema. Maibé, iha opiniaun balun mosu katak importante mak habelar advokasia hasoru saúde mentál ein jerál. Alende ne’e, komemorasaun ne’e ho objetivu atu eduka komunidade mjundiál atu fó atensaun ba problema saúde ema ho defisiénsia mentál.

Notísia relevante: Bobonaro iha ona Sentru Saúde Mentál

Jornalista   : Sérgio da Cruz

Editór         : Evaristo Soares Martins