Brunei presiza timoroan 20.000 atu ba servisu
DILI, 10 outubru 2023 (TATOLI) – Embaxadór Timor-Leste ba Brunei darusalem, Abel Guterres, dehan Brunei husu timoroan hamutuk 20.000 atu ba servisu iha área oioin.
“Brunei presiza traballadór hosi Timor atu ba servisu ne’e 20.000, ne’e númeru ida ne’ebé boot, entaun ita sei asina akordu kooperasaun ida foin bele haruka ita-nia ema ba servisu iha ne’ebá”, Abel hatete ba jornalista sira iha Palásiu Prezidensiál, tersa ne’e.
Nia esplika, antes haruka traballadór sira ba servisu, Governu sei fasilita formasaun ne’ebé másimu atu bele fasilita timoroan sira ba servisu ho di’ak.
Brunei presiza traballadór hosi Timor-Leste atu ba servisu iha área ospitalidade, ótel, restaurante, loja, agrikultura no seluk tan.
“Servisu iha ne’ebá kapas, Brunei la iha saláriu mínimu ba traballadór sira, sira selu tuir akordu ne’ebé iha, entre traballadór ho kompaña no ita-nia estadu rasik”, nia hatete.
Tanba ne’e, sei hasoru malu iha tempu besik ho Sekretariu Estadu Formasaun Profesionál no Empregu (SEFOPE) atu ko’alia kona-ba oinsa atu haruka traballadór timoroan ba servisu iha Brunei.
Tuir ajenda Prezidente Repúblika José Ramos Horta, fulan oin sei hala’o vizita traballu ba Brunei hodi hasoru malu ho Estadu Brunei atu bele selebra akordu entre nasaun rua fasilita timoroan ba servisu iha Brunei.
“Fulan oin ita-nia Prezidente sei vizita Brunei, iha vizita ne’e sei asina mós akordu balu kona-ba oinsa atu haruka ita nia timoroan sira ba servisu iha Brunei”, nia hakotu.
Jornalista: Hortencio Sanchez
Editór : Zezitu Silva
