Voluntáriu Korpu ba Pás 14 hosi EUA to’o TL
DILI, 10 outubru 2023 (TATOLI) – Voluntáriu Korpu ba Pás hamutuk 14 hosi Estadus Unidus Amerika (EUA) to’o ona iha Timor-Leste ho aviaun Citilink.
Objetivu hosi voluntáriu hirak ne’e mai Timor-Leste mak atu servisu hamutuk ho komunidade timoroan sira iha área saida de’it durante tinan rua iha ne’e.
Voluntáriu hirak ne’e to’o iha Aeroportu Internasionál Prezidente Nicolau Lobato maizmenus tuku 11:50 otl, ne’ebé simu direta hosi Enkarregadu Negósiu EUA iha Timor-Leste Marc Weinstock ho Diretór País Korpu ba Pás Jamie Fouss.
Bazeia ba pedidu hosi Governu Timor-Leste, voluntáriu hirak ne’e sei hanorin, hamutuk ho manorin lian Inglés sira no kolabora ho parseiru sira iha setór dezenvolvimentu ekonomia komunitária.
Liuhosi projetu sekundáriu, voluntáriu sira mós sei apoia Prezidente José Ramos Horta nia inisiativa hodi hadia nutrisaun no hatan ba ra’es badak.
“Hanesan voluntáriu Korpu ba Pás barak iha mundu tomak, voluntáriu hirak ne’ebé mak to’o ohin loron ne’e apaixonadu no dedikadu ba servisu no ha’u la dúvida katak sira sei lori ksolok, esperansa no buat furak barak ba komunidade iha Timor-Leste laran tomak”, hateten Marc liu hosi komunikadu ne’ebé Agência TATOLI asesu, tersa ne’e.
Iha okaziaun ne’e, Diretór Korpu ba Pás, Jamie Fouss, sente kontente hodi simu voluntáriu foun hirak ne’e.
“Ami haksolok tebes atu simu grupu daruak voluntáriu sira mai Timor-Leste hafoin COVID-19”, Diretór Korpu ba Pás refere.
“Korpu ba Pás orgullu tebes ba istória parseria ne’ebé naruk iha Timor-Leste, hahú iha tinan 2002 bainhira voluntáriu Amerikanu dahuluk sira tu’un iha Timor-Leste hodi apoia ba komunidade timoroan nia dezenvolvimentu. Dezde ida-ne’e, voluntáriu Korpu ba Pás tulun ona povu timoroan barak to’o rihun iha nasaun ne’e nia laran hodi dezenvolve emprezáriu, abilidade ba servisu no abilidade iha lian Inglés abilidade hirak ne’ebé mak esensiál hodi lori Timor-Leste nia ekonomia ba oin”, nia afirma.
Voluntáriu sira ne’e sei muda ba Gleno, iha ne’ebé sira sei hala’o formasaun ho baze komunitária durante semana 10 hodi aprende lian Tetun, diversidade interkulturál, nune’e mós dalan oinsá atu mantein seguru no saudável.
Grupu ida-ne sei simu posse nu’udar voluntáriu Korpu ba Páz iha dezembru nia rohan antes fahe ba fatfatin iha rai-laran hodi hala’o sira-nia servisu voluntáriu tinan rua,
Tuir dadus ne’ebé iha, Voluntáriu foun no tuan hamutuk ema 29 mak estadia hela iha Timor-Leste.
Korpu Pás nu’udar servisu rede voluntáriu internasionál ida, membru komunidade, nasaun país uma-na’in parseiru sira no membru ekipa sira hala’o servisu tuir ajénsia nia misaun ba amizade no dame mundiál.
Bazeia ba konvite hosi Governu sira iha mundu tomak, voluntáriu Korpu ba Pás servisu hamutuk ho membru komunidade sira lokalmente hala’o projetu ne’ebé prioritiza ba edukasaun, saúde, ambiente, agrikultura, dezenvolvimentu ekonómiku komunitária no dezenvolvimentu juventude.
Liuhosi servisu hirak ne’e, membru Korpu ba Pás nia rede dezenvolve transfere abilidade no hametin kompeténsia interkulturál ne’ebé mak tau sira-nia pozisaun nu’udar jerasaun tuir mai ba líder global.
Dezde Prezidente John F. Kennedy estabelese Korpu ba Pás iha tinan 1961, Amerikanu hamutuk 240,000-resin mak serví ona iha nasaun 142 ho voluntáriu.
Jornalista: Hortencio Sanchez
Editór : Zezito Silva
