Prezidente Autoridade RAEOA inaugura fasilidade sanitária iha Ulas Antiga
OÉ-CUSSE, 13 outubru 2023 (TATOLI – Prezidente Autoridade RAEOA, Arsénio Paixão Bano, kinta ne’e inaugura fasilidade sanitaria iha fatin izoladu Ulas Antiga iha suku Taiboko, sub-rejiau Pante Makasar.
Notísia relevante: Prezidente Autoridade RAEOA apoia harii sanitária públika ba komunidade Ulas
Arsénio Paixão Bano, informa, inisiativa ne’e Autoridade servisu hamutuk ho Sentru Formasaun Bansone, no materiál konstrusaun hetan apoia hosi entidade hotu, hodi kontrui casa de banho, tanke bee-moos, kanalizasaun bee-moos hosi bee-matan Ulas no instalasaun eletrisidade.
“Ita hatene fatin ne’e hetan vizita beibeik, inklui membru autoridade sira seluk, tanba fatin ne’e mós izoladu ida iha Taiboko, bainhira atu presiza sanitária públika suar tebes,” Arsénio Bano ba Tatoli, iha Oé-Cusse, tersa ne’e.
Nia hatutan, fasilidade sanitária atu fasilita komunidade sira bele uza ba faze ropa, no serbí ba públiku tanba besik eskola Bázika Filiál Ulas, entaun ne’e karáter esperiénsia dahuluk halo iha ne’e, ba futuru iha sei halo tán iha fatin seluk, bele halo reabilitasaun ba eskola no públiku seluk-tán.
Prezidente Sentru Formasaun Bansone, António Boquifai, hateten, projetu ne’e ezekuta durante semana rua, hahú loron 25 setembru to’o 12 outubru 2023 ne’e, ne’ebé apoia másima hosi komunidade aldeia Ulas.
“Projetu halo hosi formandu sira hosi sentru formasaun Bansone na’in-34, sira halo hanesan programa estájiu mai iha komunidade nia-leet, nune’e bele kompleta sira-nia matéria prátika iha formasaun profisionál nian,” nia katak.
Xefe suku Taiboko, Joaquim Tafin, hateten, agradese ba Autoridade RAEOA tanba konsidera aldeia Ulas Antigu nu’udar fatin izoladu ida iha sub-rejiaun Pante Makasar, maibé ho polítika Autoridade bele hakbesik dezenvolvimentu liuhosi harii eskola, dada bee-moos ba komunidade no halo fatin sanitária públiku.
Entretantu, orsamentu ba konstrusaun fasilidade ne’e gasta rihun $7, orsamentu ne’e mai hosi sentru formasaun Bansone no kontribui mós hosi Prezidente Autoridade.
Hodi halo konstrusaun fasilidade sanitaria kuartu rua, tanke bee-moos, kanalizasaun bee-moos no instalasaun eletrisidade.
Notísia relevante:Lia-na’in Taiboko realiza serimónia rituál proteje bee-matan Ulas
Jornalista: Abílio Elo Nini
Editór: Evaristo Soares Martins
