OÉ-CUSSE 16 outubru 2023 (TATOLI – Governu liuhosi Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hamutuk ho Sekretária Rejionál ba Asuntu Edukasaun, Avelina da Costa, segunda ne’e abertura ezame nasionál iha eskola sekundária jerál Palaban Rejiaun Administrativa Espesiál Oé-Cusse Ambeno (RAEOA).
Notísia relevante: Estudante 3.332 iha Oé-Cusse sai kandidatu ba ezame nasionál 2023
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, espera, estudante sira durante tinan tolu ativamente iha eskola no simu ona matéria hosi profesór sira.
“Ezame nasionál ne’ebé mak agora realiza iha nível territóriu inklui mós iha RAEOA, esperiénsia hanesan bainbain kada tinan, profesór sira iha esperiénsia ona hanorin matéria tuir kurríkulu ne’ebé iha, tán ne’e ha’u hanoin estudante sira ladún dúvida tuir ezame nasionál,” Domingos Lopes Lemos, ko’alia iha abertura ne’e.
Nia husu ba estudante sira iha territóriu nasionál, presiza vontade hodi partisipa iha ezame nasionál durante loron tolu, hodi determina susesu iha nível ensinu sekundáriu.
“Maibé agora fila-fali ba estudante idak-idak nian, atu fiar la fiar rezultadu ikus mak ita haree, tanba sei ita fiar hotu di’ik, ha’u-nia esperansa tenke pasa hotu maibé responde ba pergunta sira mak tuir regra ita labele dehan pasa de’it, katak rezultadu ikus mak determina sira-nia susesu, tán ne’e husu ba estudante sira tenke haka’as-aan estuda iha loron tolu nia laran, nune’e bele hetan rezultadu di’ak,” nia katak.
Diretór Edukasaun Oé-Cusse, Daniel Mauno, informa, estudante ne’ebé ohin partisipa iha ezame nasionál iha Rejiaun Oé-Cusse hamutuk 3.332, komposta hosi ensinu báziku iha 1.711, ensinu sekundáriu jerál iha estudante 1.172, ba ensinu tékniku vokasionál iha estudante 449.
“Totál estudante hotu ne’ebé tuir ezame nasionál iha 3.332, ohin nasionalmente sira partisipa hotu ezame nasionál,” nia katak.
Entretantu, totál ensinu sekundáriu públika iha hitu (7) no privada ida, kona-bá ensinu tékniku vokasionál iha haat (4), no sentru ba realizasaun ezame nasionál iha Oé-cusse hamutuk 32, komposta hosi ensinu báziku iha lokalidade 21, ensinu sekundáriu jerál iha fatin hitu (7), no tékniku vokasionál iha fatin haat (4).
Notísia relevante: Alunu rihun 56-resin realiza ezame nasionál iha outubru
Jornalista: Abílio Elo Nini
Editór: Evaristo Soares Martins
