KBRI konvida Assanami loke expozisaun edukasionál
DILI, 18 outubru 2023 (TATOLI) – Kedutaan Besar Repúblik Indonesia (KBRI) konvida Vise Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál no Habitasaun Komunitária, Mariano Assanami Sabino, atu ba halo abertura ba expozisaun edukasaun nian ne’ebé sei realiza iha loron 24-26, outubru ne’e, iha Pusat Kebudaya Indonézia.
“Enkontru ohin ne’e mai atu konvida Sua Exelénsia ba halo abertura expozisaun edukasaun ne’ebé envolve universidade hamutuk 40 ne’ebé sei mai fahe informasaun detallu kona-ba oinsá timoroan sira atu ba kontinua programa estudu iha Indonézia”, Adidu Edukasaun Embaxada Indonezia iha Timor-Leste Ikhfan Haris M. Sc, dehan ba jornalista sira iha Palásiu Governu, ohin.
KBRI kompromete sei fó prioridade ba timoroan sira ne’ebé iha abilidade hodi bele hetan oportunidade hodi hala’o estudu iha Indonézia iha área espesífiku sira hanesan, saúde no eletronik medis.
“Ami mós ohin informa ba Sua exelénsia, agora daudaun ne’e bolseiru timoroan na’in rua mak hala’o hela estudu iha Indonézia, foti Departementu Eletronik Medis, bainhira sira remata nia estudu bele mai servisu iha Timor-Leste”, nia hatete.
KBRI iha esperansa katak servisu hamutuk ne’e bele prepara manorin ne’ebé produtivu ba eskola sira liuliu foka ba área espesializada sira hanesan konstrusaun sivíl, mekániku, eletróniku, IT no seluk tan.
Jornalista: Hortencio Sanchez
Editór : Zezito Silva
