DILI, 24 outubru 2023 (TATOLI)—Timor-Leste no Indonézia selebra ona akordu bilaterál kona-ba asesu merkadu ba bens no servisu nian iha ámbitu adezaun nu’udar membru Organizasaun Mundiál Komérsiu (OMK).
Embaixadora Timor-Leste iha Jenebra, Lurdes Bessa no Reprezentante Indonézia iha Organizasaun Nasaun Unida (ONU), Alphyanto Rudyard, asina akordu ne’e iha loron 23 outubru 2023, ne’ebé asiste hosi Xefe Negosiadór no atuál Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay via virtuál.
“Timor-Leste nia kompromisu sai membru OMK nu’udar prioridade másima no ami mós iha kompromisu ne’ebé hanesan kona-ba adezaun ba Asosiasaun Nasaun Membru Sudeste Aziátiku (ASEAN, sigla inglés). Tanba ne’e, nu’udar ami-nia parseiru prinsipál komérsiu bilaterál nian, Timor-Leste ho firme katak Indonézia kontinua sai parseiru importante, tantu ba ASEAN nomós OMK,” Xefe Negosiadór hateten liuhosi nota ne’ebé Agência Tatoli asesu, tersa ne’e.
Notísia relevante : Timor-Leste konklui ona negosiasaun adezaun bá OMK
Akordu bilaterál ne’e marka pasu signifikativu hodi hasa’e kresimentu ekonomia, relasaun komersiál inklui esforsu Timor-Leste hodi sai membru ASEAN. Aleinde ne’e, akordu ne’e sei fó oportunidade ba investidór sira hosi nasaun rua hodi hametin liután relasaun diplomata.
Diretór Jerál Negosiasaun Komersiál Internasionál Indonézia, Djatmiko Bris Witjaksono, espresa satisfasaun ba parseria ne’ebé la’o hela no reforsa kontinuidade hodi apoia Timor-Leste nia aspirasaun adere sai ASEAN.
“Esforsu kolaborativu ne’e la’ós de’it ba OMK, maibé sei estende mós aspirasaun adere ba ASEAN. Indonézia, nu’udar membru fundadór asosiasaun, ne’ebé dezempeña papel fundamentál kona-ba promosaun adezaun Timor-Leste. Ho akordu ne’e sei reforsa liután pozisaun Indonézia nian nu’udar nasaun apoiante prinsipál ba kandidatura Timor-Leste ba ASEAN,” Djatmiko Bris Witjaksono, dehan.
Diretór ne’e subliña, momentu istóriku ne’e afirma mós vontade no determinasaun Timor-Leste hodi kumpre kritériu sira kona-ba adezaun ba ASEAN, nu’udar pasu signifikativu ba integrasaun rejionál ne’ebé kle’an liu ho kolaborasaun no dezenvolvimentu ne’ebé hanesan.
Akordu ne’e nu’udar esforsu krusiál bazeia ba Grupu Traballu nia rezultadu reuniaun daneen ne’ebé hala’o iha loron 11 outubru 2023, kona ba Timor-Leste nia adezaun ba OMK iha Zenebra, Suísa, lideradu hosi Xefe Negosiadór Francisco Kalbuadi Lay.
Asina akordu ne’e marka prezensa mós hosi Embaixadór Rui Macieira, Reprezentante Permanente Portugal no Prezidente Grupu Traballu Timor-Leste nia Adezaun ba OMK no Diretora Adezaun OMK, Maika Oshikawa hamutuk ho funsionáriu dedikadu hosi misaun Timor-leste no Indonézia iha Jenebra, Suísa.
Jornalista : Antónia Gusmão
Editora : Julia Chatarina
