Komunidade suku Tirilolo husu xefe suku foun hakbesik ba povu
BAUCAU, 28 outubru 2023 (TATOLI) – Komunidade suku Tirilolo, postu administrativu Baucau Vila husu xefe suku foun tenki hakbesik ba povu tanba sai ukun atu serbí.
Eis xefe suku Tirilolo, Aleixo da Silva Belo, esplika, eleisaun lideransa suku demokrátiku tebes nune’e komunidade hakarak fo apoia ba joven sira tanba iha espíritu atu kria dezenvolvimentu iha suku.
“Hau esperu katak sira foin sa’e bele hakat ba oin ona no bele hakbesik liuba povu nune’e rona hanoin hodi lori dezenvolvimentu iha suku,” Eis Xefe suku Tirilolo hateten iha Vila Antiga, sábadu ne’e.
Tuir nia, suku Tirilolo presiza lideransa ne’ebé hatene akumula tanba jeografiamente iha área rua hanesan rurál no urbana inklui iha lian materna rua kompostu Makasa’e no Uaimaa.
Lideransa suku tenke sai xefia ba inan-aman no komunidade liuliu tún direita ba terrenu atu haree no tau matan ba kbiit laek tanba prioridade dahuluk mak povu.
“Komunidade mak hili xefe suku entaun tenke prontu servisu ba inan-aman sira,” Aleixo Belo akresenta.
Aleixo Belo, argumenta, kandidatura xefe suku nain-haat iha poténsia atu ukun, importante tenke prontu hasoru dezafiu hotu inklui hatene kolabora ho parseiru dezenvolvimentu inklui institusaun governu sira liuhosi Ministériu Admistrasaun Estatal (MAE) ho Autoridade Administrasaun Munisipál.
Bainhira asume ona kargu xefe suku prioridade dahuluk mak trasa planu programa, enkontru ho komunidade kada trimestrál, estabelese konsellu suku no presiza transparánsia.
Tuir obervasaun Agência TATOLI iha terenu nota, sentru votasaun iha suku Tirilolo hahú loke iha oras 07:00 dadeer no hetan entuziasmu hosi komunidade hodi partisipa iha eleisaun lideransa komunitária.
Suku Tirilolo hamutuk kandidatura na’in-haat hanesan xefe suku sesante Ricardo Ernesto Belo, atuál xefe aldeia Betulale Elvino Freitas Belo no Juventude Martinho da Costa Belo inklui Aldermiro da Silva Belo.
Totál vontantes iha suku Tirilolo hamutuk 6.877 hosi aldeia neen komposta hosi Betulale, Lutumutu, Parlamentu, Lialailesu, Caisido no Osso-ua.
Jornalista : Natalino Belo
Editór : Evaristo Soares Martins
