Horta lansa “Dapur Prezidente Repúblika ba Povu” iha Hera
DILI, 30 outubru 2023 (TATOLI) – Prezidente Repúblika, José Ramos Horta, lansa “dapur ba povu” iha Suku Mota-Kiik, Postu Administrativu Hera, Munisípiu Dili ne’ebé apoiu hosi Governu Kánada ba Timor-Leste.
“Programa ida-ne’e Prezidente Repúblika nian, hanesan iha Palásiu Prezidensiál hahú tinan ida ona, orsamentu hosi Prezidente Repúblika atu prepara hahan hodi fó haan ba povu kiak nia oan sira, ohin iha ne’e ita harii dapur hodi bele tein hahan semana ida dala haat hodi fó han ba povu kiak nia oan sira, ida-ne’e orsamentu apoiu hosi Governu Kánada”, Prezidente Repúbklika dehan ba jornalista sira iha Hera, ohin.
Nia dehan, Governu Kánada ajuda orsamentu tanba haree ba Prezidente Repúblika nia programa ne’e di’ak tebes hodi fó han ba labarik sira iha Palásiu Prezidensiál kuaze 400 kada loron, hahú segunda to’o kinta, mak Kánada hakarak apoiu fundu ba Prezidente Repúblika hodi loke mós han fatin ba labarik sira iha Hera ne’ebé maioria mai hosi família kiak sira nia oan.
“Ida-ne’e la’os hanesan merenda eskolár, merenda eskolár ne’e Governu mak jere, ida-ne’e programa Prezidente nian, Kánada haree ba di’ak mak sira mós fó apoiu no Prezidente Repúblika mak jere, ida iha Hera agora ne’e ba labarik oan sira, tuir survey ne’e Palásiu halo labarik barak iha ne’e má nutrisaun entaun harii duni programa ne’e iha ne’e hodi fó han labarik sira ne’e”, nia hatete.
“Orsamentu limitadu tebes hosi Governu Kánada ne’e mak hahan ba labarik sira semana ida ita fó dala tolu de’it, maibé ha’u sei ko’alia ho embaxada balun atu fó apoiu, nune’e labarik sira bele han semana ida dala lima, labarik sira han di’ak de’it, etu, naan, mantolun modo tahan no ai-fuan fresku, ai-han sira ne’e Timor-Leste nian, ha’u lakoi mai hosi liur”, nia revela.
Labarik ne’ebé lokaliza iha fatin ne’ebá ne’ebé sai benefisiáriu ba programa ne’e, besik 200-resin.
Jornalista: Hortencio Sanchez
Editór : Zezito Silva
